പത്തനംതിട്ട : ശബരി റെയില് പാതയുടെ പകുതി ചെലവ് സംസ്ഥാന സര്ക്കാര് വഹിക്കുമെന്നും മറിച്ചുള്ള പ്രചാരണങ്ങള് വസ്തുതാ വിരുദ്ധമാണെന്നും മുഖ്യമന്ത്രി പിണറായി വിജയന്. പൂര്ണ്ണമായും ചെലവ് വഹിക്കേണ്ടത് കേന്ദ്രസര്ക്കാര് ആണെങ്കിലും ശബരി റെയില്പാത പ്രധാനപ്പെട്ട പദ്ധതി എന്ന നിലയിലാണ് സംസ്ഥാന സര്ക്കാര് പകുതി ചെലവ് നിര്വഹിക്കാന് തയ്യാറായതെന്നും പമ്പാ മണപ്പുറത്ത് ആഗോള അയ്യപ്പ സംഗമം ഉദ്ഘാടനം ചെയ്തുകൊണ്ട് മുഖ്യമന്ത്രി പറഞ്ഞു.
റെയില്പാതയുടെ പ്രാധാന്യം മനസ്സിലാക്കിക്കൊണ്ടുള്ള ഇടപെടലുകളാണ് സംസ്ഥാന സര്ക്കാര് നടത്തുന്നത്. റെയില്വേ മന്ത്രാലയവുമായി ഏറ്റവും ഒടുവില് നടത്തിയ ചര്ച്ചയിലും 50 ശതമാനം ചെലവ് സര്ക്കാര് വഹിക്കുമെന്ന് അറിയിച്ചിരുന്നു.
വസ്തുതകള് ഇതായിരിക്കേ തീര്ത്തും തെറ്റായ കാര്യങ്ങളാണ് പ്രചരിപ്പിക്കുന്നത്. ഒരടിസ്ഥാനമില്ലാത്ത വാര്ത്തകള് പച്ച നുണയായി പ്രചരിപ്പിക്കുകയാണ്.
ശബരിമല വിമാനത്താവളത്തിന് ഈ വര്ഷം ഡിസംബറോടെ എല്ലാ അനുമതികളും ലഭ്യമാകും എന്നാണ് കരുതുന്നത്. അടുത്ത വര്ഷത്തോടെ സ്ഥലമേറ്റെടുപ്പ് പൂര്ത്തിയാക്കി വിമാനത്താവളം നിര്മ്മാണ പ്രവൃത്തികളിലേക്ക് കടക്കാനാകും എന്ന് പ്രതീക്ഷിക്കുന്നു. ശബരിമല റോപ് വേയുടെ കാര്യത്തിലും കാര്യമായ പുരോഗതി നേടാനായെന്നു മുഖ്യമന്ത്രി പറഞ്ഞു.
