ഇടുക്കി : ശബരിമലയിലെ ഈ വര്ഷത്തെ മണ്ഡല മകരവിളക്ക് തീര്ഥാടനത്തിനുള്ള ഒരുക്കങ്ങള് വിലയിരുത്താന് ജില്ലാ കളക്ടര് ഷീബ ജോര്ജ്ജിന്റെ അധ്യക്ഷതയില് ഓണ്ലൈനായി യോഗം ചേര്ന്നു. കോവിഡ് വ്യാപനം കുറഞ്ഞ സാഹചര്യത്തില് ഇത്തവണത്തെ തീര്ഥാടനകാലത്തു കൂടുതല് തീര്ഥാടകര് ശബരിമലയിലേക്ക് എത്താന് സാധ്യതയുണ്ടെന്ന് കളക്ടര് പറഞ്ഞു. മുന്നൊരുക്കങ്ങളുടെ ഭാഗമായുള്ള എല്ലാ ജോലികളും സമയബന്ധിതമായി പൂര്ത്തിയാക്കാന് വകുപ്പ് മേധാവികളോട് കളക്ടര് നിര്ദ്ദേശിച്ചു. തീര്ഥാടനകാലം ആരംഭിക്കുന്നതിനു മുന്പേ ശബരിമലയിലേക്കുള്ള എല്ലാ റോഡുകളിലും അറ്റകുറ്റപ്പണി പൂര്ത്തിയാക്കണം. തീര്ഥാടകരെത്തുന്ന വിശ്രമകേന്ദ്രങ്ങളും കുളിക്കടവുകളും അറ്റകുറ്റപ്പണി നടത്തി സുരക്ഷിതമാക്കും. ഭക്ഷ്യസുരക്ഷയും ഗുണനിലവാരവും ഉറപ്പാക്കാന് ഭക്ഷ്യസുരക്ഷാ വകുപ്പും സിവില് സപ്ലൈസ് വകുപ്പും പ്രത്യേക പരിശോധന നടത്തണം.
തീര്ഥാടകരുടെ സൗകര്യത്തിനായി ഗതാഗത തടസ്സമുണ്ടാകാതെ വാഹനങ്ങളുടെ പാര്ക്കിങ്ങിന് പ്രത്യേക സ്ഥലങ്ങള് കണ്ടെത്തണം. എല്ലാ സര്ക്കാര് ആശുപത്രികളിലും തീര്ഥാടനകാലത്ത് ആവശ്യമായ ക്രമീകരണം ഏര്പ്പെടുത്തും. സുരക്ഷ ശക്തമാക്കാന് പോലീസ് ഉദ്യോഗസ്ഥരെ പ്രത്യേക ഡ്യൂട്ടിയില് വിന്യസിക്കും. മാലിന്യസംസ്കരണം ഉറപ്പാക്കുന്നതിന് ശുചിത്വമിഷന്, മലിനീകരണ നിയന്ത്രണ ബോര്ഡ് എന്നിവരുടെ നേതൃത്വത്തില് പ്രവര്ത്തനങ്ങള് ഏകോപിപ്പിക്കും.
റോഡിന് വശങ്ങളില് അപകട മുന്നറിയിപ്പ് ബോര്ഡുകളും പ്ലാസ്റ്റിക്കുകള് വഴിയരികില് വലിച്ചെറിയുന്നതിനെതിരെ ബോധവത്കരണ ബോര്ഡുകളും വിവിധ ഭാഷകളില് സ്ഥാപിക്കണം. ഓണ്ലൈനായി ചേര്ന്ന യോഗത്തില് വിവിധ പഞ്ചായത്ത് പ്രസിഡന്റുമാര്, സബ് കളക്ടര്, ആര്ഡിഒ, ഡിവൈഎസ്പി, വിവിധ വകുപ്പ് മേധാവികള്, പഞ്ചായത്ത് സെക്രട്ടറിമാര് തുടങ്ങിയവര് പങ്കെടുത്തു.
