തിരുവനന്തപുരം: ശബരിമലയിൽ കന്നിമാസ പൂജകളോടനുബന്ധിച്ചുള്ള ദർശനത്തിനായി ഓൺലൈൻ വെർച്വൽ ക്യൂ ബുക്കിങ് ആരംഭിച്ചു. ദർശനം നടത്താൻ ആഗ്രഹിക്കുന്ന ഭക്തർ ഓൺലൈൻ സംവിധാനത്തിലൂടെ സ്ലോട്ട് മുൻകൂട്ടി ബുക്ക് ചെയ്യണം. സെപ്റ്റംബർ 16നാണ് കന്നിമാസ പൂജകൾക്കായി ശബരിമല നട തുറക്കുന്നത്. ദർശനത്തിനുള്ള വെർച്വൽ ക്യൂ ബുക്കിങ് www.sabarimalaonline.org എന്ന വെബ്സൈറ്റ് വഴിയാണ് നടത്തേണ്ടത്. ശബരിമലയിൽ എത്തുന്ന എല്ലാ ഭക്തരും ദർശനത്തിനായി സ്ലോട്ട് ഉറപ്പാക്കണമെന്ന് അധികൃതർ അറിയിച്ചു.
സന്നിധാനത്ത് താമസിക്കാൻ ആഗ്രഹിക്കുന്ന ഭക്തർക്ക് തിരുവിതാംകൂർ ദേവസ്വം ബോർഡിന് കീഴിലുള്ള ഗസ്റ്റ് ഹൗസുകളിലും പിൽഗ്രിം സെന്ററുകളിലും മുറി മുൻകൂട്ടി ബുക്ക് ചെയ്യാം. ഇതിനായി www.onlinetdb.com എന്ന വെബ്സൈറ്റ് വഴിയാണ് ബുക്കിങ് നടത്തേണ്ടത്.
