ശബരിമല : മകരവിളക്ക് തീര്ഥാടനത്തിനായി ശബരിമല ശ്രീ ധര്മ്മശാസ്താ ക്ഷേത്രനട നാളെ (ഡിസംബര് 30) വൈകുന്നേരം അഞ്ചിന് തുറക്കും. 31ന് പുലര്ച്ചെ മുതല്ക്കെ അയ്യപ്പഭക്തരെ പ്രവേശിപ്പിക്കുകയുള്ളൂ. 2021 ജനുവരി 19 വരെ ഭക്തര്ക്ക് ദര്ശന സൗകര്യം ഉണ്ട്. ജനുവരി 20 ന് ശബരിമല നട അടയ്ക്കും. വെര്ച്വല് ക്യൂ മുഖേന ബുക്ക് ചെയ്തവര്ക്കു മാത്രമാണ് ദര്ശനം.
എല്ലാ ദിവസവും 5000 പേര്ക്ക് വീതം പ്രവേശനം ഉണ്ടാകും. 31 മുതല് ദര്ശനത്തിനെത്തുന്ന അയ്യപ്പഭക്തര്ക്ക് കോവിഡ് – 19 ആര്ടിപിസിആര് / ആര്ടി ലാമ്പ് / എക്സ് പ്രസ്സ് നാറ്റ് നെഗറ്റീവ് സര്ട്ടിഫിക്കറ്റ് നിര്ബന്ധമാക്കി. 48 മണിക്കൂര് ആണ് സര്ട്ടിഫിക്കറ്റിന്റെ കാലാവധി. കോവിഡ് പരിശോധനാ നെഗറ്റീവ് സര്ട്ടിഫിക്കറ്റ് ഇല്ലാത്ത ഒരു ഭക്തരെയും ശബരിമലയിലേക്ക് കടത്തിവിടുകയില്ല. ഭക്തര്ക്ക് നിലയ്ക്കലില് കോവിഡ്- 19 പരിശോധന സംവിധാനം ഉണ്ടാവില്ല.
