പത്തനംതിട്ട : ശബരിമല ക്ഷേത്രത്തിലെ ആചാരം സംബന്ധിച്ച് സുപ്രീംകോടതിയില് ചെമ്പോല സമര്പ്പിച്ചതായി അറിയില്ലെന്ന് തിരുവിതാംകൂര് ദേവസ്വം ബോര്ഡ് പ്രസിഡന്റ് എന്.വാസു. അത് ആധാരമായ രേഖകളും അല്ല. വിവാദമുയര്ന്ന പശ്ചാത്തലത്തില് വിശദമായി പരിശോധിക്കാന് നിര്ദ്ദേശം നല്കിയെന്നും അദ്ദേഹം പറഞ്ഞു. പുരാവസ്തുതട്ടിപ്പ് കേസില് ശബരിമലയുമായി ബന്ധപ്പെട്ട ചെമ്പോല ഉപയോഗിച്ച് വ്യാജപ്രചാരണം നടത്തിയത് ഉള്പ്പടെ അന്വേഷിക്കുമെന്ന് മുഖ്യമന്ത്രി പിണറായി വിജയന് നിയമസഭയില് വ്യക്തമാക്കിയതിന് പിന്നാലെയാണ്. തിരുവിതാംകൂര് ദേവസ്വം ബോര്ഡിന്റെ വിശദീകരണം.
ശബരിമല കേസില് ഈ ചെമ്പോല സര്ക്കാര് സുപ്രിംകോടതിയില് സമര്പ്പിച്ചെന്ന സ്ഥിരീകരിക്കാത്ത വിവരങ്ങള് പന്തളം രാജകുടുംബത്തിനാണ് ലഭിച്ചത്. എന്നാല് ഇത്തരത്തില് ചെമ്പോല തെളിവായി സമര്പ്പിച്ചതായി തന്റെ അറിവില് ഇല്ലെന്ന് മുന് ദേവസ്വം കമ്മിഷണര് കൂടിയായ തിരുവിതാംകൂര് ദേവസ്വം ബോര്ഡ് പ്രസിഡന്റ് എന്.വാസു. സര്ക്കാര് കോടതിയില് നല്കിയ റിപ്പോര്ട്ടില് ചെമ്പോലയെക്കുറിച്ച് പറയുന്നുണ്ടോയെന്ന പരിശോധിക്കാന് അഭിഭാഷകരോട് പന്തളംരാജകുടുംബം ആവശ്യപ്പെട്ടിട്ടുണ്ട്. വിവാദം ഉയര്ന്ന് പശ്ചാത്തലത്തില് ദേവസ്വം ബോര്ഡും രേഖകള് പരിശോധിക്കും. പുരാവസ്തുക്കളുടെ നിജസ്ഥിതി അറിയാന് ബന്ധപ്പെട്ട വകുപ്പുകളോട് സര്ക്കാര് ആവശ്യപ്പെട്ടിട്ടുണ്ട്.
