പത്തനംതിട്ട : വെർച്വൽ ക്യൂവിലൂടെ രജിസ്റ്റർ ചെയ്ത് ശബരിമല ദർശനം ഉറപ്പാക്കിയ അയ്യപ്പഭക്തർ മാത്രമെ ഈ മണ്ഡല-മകരവിളക്ക് കാലത്ത് ശബരിമലയിൽ എത്താവൂ എന്ന് തിരുവിതാംകൂർ ദേവസ്വം ബോർഡ് പ്രസിഡൻ്റ് എൻ വാസു.
വെർച്വൽ ക്യൂ വഴി ബുക്ക് ചെയ്യാതെ തന്നെ ശബരിമല ദർശനം ആവശ്യപ്പെട്ട് നിലയ്ക്കലിൽ ഓരോ ദിവസവും നിരവധി അയ്യപ്പഭക്തൻമാർ എത്തുന്നത് ദേവസ്വം ബോർഡിന്റെ ശ്രദ്ധയിൽപ്പെട്ടതായി ദേവസ്വം ബോർഡ് പ്രസിഡൻ്റ് അഡ്വ.എൻ.വാസു പറഞ്ഞു. ഇത്തരത്തിൽ വെർച്വൽ ക്യൂ ബുക്ക് ചെയ്യാതെ ദർശനം തേടിയെത്തുന്ന അയ്യപ്പഭക്തരെ മടക്കി അയക്കുക മാത്രമെ ഇപ്പോൾ നിർവ്വാഹമുള്ളൂവെന്നും അദ്ദേഹം അറിയിച്ചു. അതിനാൽ അയ്യപ്പഭക്തർ വെർച്വൽ ക്യൂ ബുക്കിംഗ് ഉറപ്പാക്കുന്ന കാര്യം പ്രത്യേകം ശ്രദ്ധിക്കണമെന്നും പ്രസിഡന്റ് പറഞ്ഞു.
