പത്തനംതിട്ട : ശബരിമല മണ്ഡല-മകരവിളക്ക് തീര്ഥാടനത്തോടനുബന്ധിച്ച് സന്നിധാനം, നിലയ്ക്കല്, പമ്പ താല്ക്കാലിക റേഞ്ച് ഓഫീസുകളുടെ പ്രവര്ത്തനം ആരംഭിച്ചു. നവംബര് മാസം 12 മുതല് 2022 ജനുവരി 20 വരെ റാന്നി താലൂക്കിലെ പെരുനാട് വില്ലേജിലുള്പ്പെടുന്ന ചാലക്കയം, പമ്പ, പമ്പ റിവര്, ത്രിവേണി, കരിമല, ചെറിയാനവട്ടം, വലിയാനവട്ടം, നീലിമല, ശബരിപീഠം, മരക്കൂട്ടം, സന്നിധാനം, കുമ്പളാംതോട്, ഒരക്കുഴി, പ്ലാപ്പളളി, നിലയ്ക്കല്, അട്ടത്തോട്, കൊല്ലമൂഴി എന്നീ ഭാഗങ്ങളിലും കൊല്ലമുള വില്ലേജിലെ പമ്പാവാലി (അരയാഞ്ഞിലിമൂട് ഒഴികെ) എന്നീ പ്രദേശങ്ങളില് മദ്യം, മയക്കുമരുന്ന്, പുകയില ഉല്പ്പന്നങ്ങള് എന്നിവയുടെ വില്പ്പന, വിപണനം, ഉപഭോഗം എന്നിവ നിരോധിച്ചു.
മദ്യ നിരോധനം സംബന്ധിച്ച് ശബരിമല, പമ്പ, നിലയ്ക്കല് പ്രദേശങ്ങളിലേക്ക് കടന്നുവരുന്ന തീര്ത്ഥാടകരും കച്ചവടക്കാരും മറ്റെല്ലാ ജനവിഭാഗങ്ങളും ജാഗരൂകരായിരിക്കണമെന്ന് എക്സൈസ് വകുപ്പ് അറിയിച്ചു. ശബരിമല തീര്ഥാടനത്തിന് മുന്നോടിയായി പമ്പ, നിലയ്ക്കല്, അട്ടത്തോട്, ആങ്ങമൂഴി, ഗവി, കോന്നി, റാന്നി താലൂക്കുകളിലെ വനപ്രദേശങ്ങള് എന്നിവിടങ്ങളില് എക്സൈസ്, പോലീസ്, ഫോറസ്റ്റ് സംയുക്ത റെയ്ഡുകള് നടത്തിവരുന്നു.
ശബരിമല പൂങ്കാവന പ്രദേശത്ത് മദ്യനിരോധനം സംബന്ധിച്ച വിവിധ ഭാഷകളിലുളള മുന്നറിയിപ്പ് ബോര്ഡുകള് സ്ഥാപിച്ചിട്ടുണ്ട്. മണ്ണാറക്കുളഞ്ഞി മുതല് പമ്പ വരെ എക്സൈസ് വകുപ്പിന്റെ ആഭിമുഖ്യത്തില് 24 മണിക്കൂറും വാഹന പരിശോധന ഏര്പ്പെടുത്തിയിട്ടുണ്ട്. കൂടാതെ പത്തനംതിട്ട ജില്ലയിലെ വിവിധ ഭാഗങ്ങളില് രണ്ട് സ്ട്രൈക്കിംഗ് യൂണിറ്റുകളെയും എന്ഫോഴ്സ്മെന്റ് പ്രവര്ത്തനങ്ങള്ക്കായി നിയോഗിച്ചിട്ടുണ്ട്.
സന്നിധാനം, പമ്പ, നിലയ്ക്കല് താല്ക്കാലിക റേഞ്ച് ഓഫീസുകളോടൊപ്പം തന്നെ പമ്പ കേന്ദ്രീകരിച്ച് അസി. എക്സൈസ് കമ്മീഷണറുടെ നേതൃത്വത്തില് എക്സൈസ് കണ്ട്രോള് റൂമും ഇന്ന്(നവംബര് 12 വെള്ളി) മുതല് ആരംഭിക്കും. മദ്യമയക്കുമരുന്ന് സംബന്ധിച്ച വിവരങ്ങള് ജില്ലാ കണ്ട്രോള് റൂം നമ്പരായ 0468-2222873 ലേക്ക് അറിയിക്കണമെന്ന് ഡെപ്യൂട്ടി എക്സൈസ് കമ്മീഷണര് ബി. വേണു ഗോപാലക്കുറുപ്പ് അറിയിച്ചു.
