പത്തനംതിട്ട : മണിയാര്‍ അള്ളുങ്കൽ ഭാഗത്ത് വെള്ളം ഉയരുന്ന സാഹചര്യത്തിൽ മണിയാർ ബാരേജിലെ 5 ഷട്ടറുകളും 4 മീറ്റർ ഉയർത്താൻ സാധ്യത ഉണ്ടെന്നും ഇതു മൂലം പമ്പാനദിയിൽ 3 മീറ്റർ എങ്കിലും ജലനിരപ്പ് ഉയരുന്ന സാഹചര്യമാണ് നിലവിലുള്ളതെന്നും അതിനാൽ നദീതീരങ്ങളിൽ താമസിക്കുന്നവരും പൊതുജനങ്ങളും ജാഗ്രത പുലർത്തണമെന്നും ജില്ലാ കളക്ടർ പി.ബി നൂഹ് അറിയിച്ചു.
ജില്ലയിൽ ശക്തമായ മഴ തുടരുന്ന സാഹചര്യത്തിൽ വ്യാഴാഴ്ചത്തെ കണക്കുപ്രകാരം പ്രധാന ഡാമുകളായ കക്കിയിൽ 950.54 മീറ്ററും പമ്പയിൽ 974.3 മീറ്ററുമാണ് ഇപ്പോഴത്തെ ജലനിരപ്പ്. ഒൻപതുവരെ ശക്തമായ മഴ പെയ്യുമെന്ന് കേന്ദ്ര കാലാവസ്ഥാ വകുപ്പിന്റെ പ്രവചനമുണ്ട്. വ്യാഴാഴ്ച മൂഴിയാർ ഡാമിന്റെ മൂന്നു ഷട്ടറുകൾ 30 സെന്റിമീറ്റർ വീതം ഉയർത്തി 51.36 ക്യൂമെക്സ് നിരക്കിൽ കക്കാട്ട് ആറിലേക്ക് ജലം ഒഴുക്കിവിട്ടു തുടങ്ങിയിട്ടുണ്ട്. ഇതുമൂലം കക്കാട്ടാറിൽ ആങ്ങമൂഴി, സീതത്തോട് വരെയുള്ള പ്രദേശങ്ങളിൽ 50 സെന്റിമീറ്റർ വരെ ജലനിരപ്പ് ഉയരാൻ സാധ്യതയുണ്ടെന്നും എല്ലാവരും ജാഗ്രത പാലിക്കണമെന്നും കളക്ടർ അഭ്യര്‍ഥിച്ചു.
