തിരുവനന്തപുരം : കേന്ദ്ര സർക്കാർ പുറത്തിറക്കിയ ഭാരത് റൈസിന് ബദലായി സംസ്ഥാന സർക്കാർ ഇറക്കുന്ന ശബരി കെ റൈസിന്റെ വിൽപ്പന ഇന്ന് മുതൽ ആരംഭിക്കും. നിലവിൽ സപ്ലൈകോ വഴി സബ്സിഡിയായി കിട്ടിയിരുന്ന 10 കിലോ അരിയിൽ അഞ്ച് കിലോയാണ് കെ റൈസായി വിൽപ്പന നടത്താൻ തീരുമാനിച്ചിരിക്കുന്നത്. ബാക്കി അഞ്ച് കിലോ സപ്ലൈകോ വഴി കിട്ടും. വിൽപ്പനയുടെ ഉദ്ഘാടനം മുഖ്യമന്ത്രി നിർവഹിക്കും. ജയ അരി കിലോക്ക് 29 രൂപക്കും കുറുവ അരിയും മട്ട അരിയും 30 രൂപക്കുമാണ് വിൽക്കുക. തിരുവനന്തപുരത്ത് ജയ അരിയും കോട്ടയം, എറണാകുളം മേഖലയില് മട്ട അരിയും, പാലക്കാട്, കോഴിക്കോട് മേഖലയില് കുറുവ അരിയുമാകും വിതരണത്തിനെത്തുക.
ആദ്യഘട്ടത്തില് അഞ്ചുകിലോ അരിയുടെ പാക്കറ്റാണ് നല്കുക എന്നും അധികൃതർ അറിയിച്ചു. സപ്ലൈകോയുടെയും ശബരി ബ്രാന്ഡ് ഉത്പന്നങ്ങളുടെയും പ്രമോഷന്റെ ഭാഗമായിട്ടാണ് ആദ്യ ഘട്ടത്തില് ശബരി കെ റൈസ് ബ്രാന്ഡഡ് സഞ്ചിയില് വിതരണം ചെയ്യുന്നത്. പൊതുജനങ്ങള്ക്ക് കുറഞ്ഞ വിലയില് നല്ലയിനം അരി ലഭ്യമാക്കുന്നതിന്റെ ഭാഗമായാണ് സപ്ലൈകോ മുഖേന ശബരി കെ റൈസ് എന്ന ബ്രാന്ഡില് അരി വിതരണം ചെയ്യാന് തീരുമാനിച്ചത്. ടെന്ഡര് നടപടികള് പാലിച്ചു കൊണ്ട് ഗുണനിലാവരം ഉറപ്പു വരുത്തിയാണ് അരി സംഭരിച്ചിട്ടുള്ളതെന്ന് മന്ത്രി ജി.ആർ.അനിൽ പറയുന്നു.
