മുംബൈ : തോക്ക് ലൈസൻസിന് നടൻ സൽമാൻ ഖാന് മുംബൈ പോലീസിന്റെ അനുമതി. താരത്തിന് വധഭീഷണി ഉണ്ടായതിനെ തുടർന്ന സാഹചര്യത്തിൽ സൽമാൻ ലൈസൻസിന് അപേക്ഷിച്ചിരുന്നു. താരത്തിന് ഒരു തോക്കിനുള്ള ലൈസൻസ് നൽകിയിട്ടുണ്ടെന്ന് മുംബൈ പോലീസ് അറിയിച്ചു. എന്നാൽ ഏത് തോക്ക് വാങ്ങാം എന്നതിനെക്കുറിച്ച് പരാമർശമില്ല. സാധാരണയായി ഒരാളുടെ സംരക്ഷണത്തിനായി .32 കാലിബർ റിവോൾവർ അല്ലെങ്കിൽ പിസ്റ്റൾ ആണ് വാങ്ങുന്നത്.
ജൂലൈ 22 ന് താരം ഇതുമായി ബന്ധപ്പെട്ട് മുംബൈ പോലീസ് കമ്മീഷണർ വിവേക് ഫൻസാൽക്കറെ കണ്ടിരുന്നു. ലൈസൻസിന് അപേക്ഷിക്കുകയും ചെയ്തിരുന്നു. പഞ്ചാബി ഗായകനും കോൺഗ്രസ് നേതാവുമായിരുന്ന സിദ്ധു മൂസെവാല അജ്ഞാതരുടെ ആക്രമണത്തിൽ കൊല്ലപ്പെട്ടതിന് പിന്നാലെയാണ് സൽമാൻ ഖാനും പിതാവിനും നേരെ വധഭീഷണി ഉയർന്നത്. മൂസെവാലയുടെ ഗതി നിങ്ങൾക്കമുണ്ടാവും എന്നായിരുന്നു ഭീഷണി.
