കോഴിക്കോട് : ജെൻഡർ ന്യൂട്രൽ ആശയങ്ങൾ സമൂഹത്തിൽ പ്രചരിപ്പിക്കാനുള്ള അജണ്ടകൾക്കെതിരെ സമസ്ത കേരള ജം-ഇയ്യത്തുൽ ഉലമ വെള്ളിയാഴ്ച പ്രാർത്ഥനക്ക് ശേഷം പള്ളികളിൽ ബോധവത്കരണം നടത്തും. ഈ വിഷയത്തിൽ സമൂഹത്തിൽ അവബോധം സൃഷ്ടിക്കാൻ അടുത്തിടെ മുസ്ലിംലീഗ് വിളിച്ചുചേർത്ത മുസ്ലീം സംഘടനകളുടെ യോഗം തീരുമാനിച്ചിരുന്നു. വിദ്യാഭ്യാസ സ്ഥാപനങ്ങളിൽ ജെൻഡർ ന്യൂട്രല് ആശയങ്ങൾ അടിച്ചേൽപ്പിക്കുന്നതിനെ എതിർക്കാനും യോഗം തീരുമാനിച്ചിരുന്നു.
എൽജിബിടിക്യു, ജെൻഡർ ന്യൂട്രാലിറ്റി വിഷയങ്ങളിലെ വിവിധ വശങ്ങൾ കൈകാര്യം ചെയ്യാൻ പള്ളികളിലെ ഖത്തീബുമാരെ സജ്ജരാക്കുന്നതിനായി ഓഗസ്റ്റ് 24 ന് കോഴിക്കോട്ട് സെമിനാർ സംഘടിപ്പിക്കും. പാശ്ചാത്യ രാജ്യങ്ങളിൽ നിന്ന് ഉത്ഭവിച്ച ജെൻഡർ ന്യൂട്രാലിറ്റിയുടെ അപകടകരമായ പ്രവണതകൾ കേരളത്തിലും ദൃശ്യമായിക്കൊണ്ടിരിക്കുകയാണ്. പുരോഗമനവാദികൾ എന്ന് വിളിക്കപ്പെടുന്നവരുടെ അന്ധവിശ്വാസങ്ങളെ ചെറുക്കാനുള്ള ശ്രമമാണ് സെമിനാർ’- സമസ്ത കേരള ജം-ഇയ്യത്തുൽ ഖുതുബ കമ്മിറ്റി സംസ്ഥാന ജനറൽ സെക്രട്ടറി നാസർ ഫൈസി കൂടത്തായി മാധ്യമങ്ങളോട് പ്രതികരിച്ചു.