കോട്ടയം : ബിജെപി സംസ്ഥാന വക്താവ് സ്ഥാനത്തുനിന്നു സന്ദീപ് വാരിയരെ ഒഴിവാക്കിയതിനു പിന്നില് സാമ്പത്തിക തിരിമറിയെന്ന് സൂചന. സന്ദീപിനെതിരായ നടപടിക്കു പിന്നില് സംഘടനാപരമായ വിഷയമാണെന്നു സംസ്ഥാന പ്രസിഡന്റ് കെ.സുരേന്ദ്രന് വിശദീകരിച്ചെങ്കിലും സാമ്പത്തിക ക്രമക്കേട് ഉള്പ്പെടുന്ന പരാതികള് കൂടി പരിഗണിച്ചാണു നടപടിയെന്നാണു വിവരം.
കോട്ടയത്ത് ചേര്ന്ന സംസ്ഥാന സമിതി യോഗത്തില് സന്ദീപ് പങ്കെടുക്കാനെത്തിയെങ്കിലും നേതൃത്വം അതിന് അനുവദിച്ചില്ല. ആരോപണത്തിന്റെ ഗൗരവം കണക്കിലെടുത്ത് പാര്ട്ടിയില് നിന്നു തന്നെ അദ്ദേഹത്തെ ഒഴിവാക്കണമെന്നു ഒരു വിഭാഗം ആവശ്യമുന്നയിച്ചെങ്കിലും അന്വേഷണത്തിനുശേഷം കൂടുതല് നടപടി എന്നാണു നേതൃത്വത്തിലെ ധാരണ.
കോട്ടയത്ത് തിങ്കളാഴ്ച രാവിലെ നടന്ന പാര്ട്ടി കോര്കമ്മിറ്റിയാണ് വക്താവ് സ്ഥാനത്തുനിന്നു സന്ദീപിനെ നീക്കാനുളള തീരുമാനം അംഗീകരിച്ചത്. ഇതോടെ യുവമോര്ച്ച, പാര്ട്ടി കമ്മിറ്റികളില് സംസ്ഥാന ഭാരവാഹിത്വം വഹിച്ച് പാര്ട്ടി വക്താവായി, ചാനലുകളിലും വേദികളിലും നിറഞ്ഞ വാരിയര് പാര്ട്ടിയിലെ സാധാരണ അംഗം മാത്രമായി.
