ഇന്ത്യൻ ഏകദിന ടീമിലെ വിക്കറ്റ് കീപ്പർ സ്ഥാനത്തെച്ചൊല്ലി മലയാളി താരം സഞ്ജു സാംസണും റിഷഭ് പന്തും തമ്മിൽ കടുത്ത പോരാട്ടം. ഐപിഎൽ 2026-ലെ മികച്ച പ്രകടനം സഞ്ജുവിന് വലിയ മുൻതൂക്കം നൽകുന്നു. ചെന്നൈ സൂപ്പർ കിംഗ്സിന് വേണ്ടി കളിക്കുന്ന സഞ്ജു ഈ സീസണിൽ എട്ട് മത്സരങ്ങളിൽ നിന്ന് രണ്ട് സെഞ്ച്വറികളടക്കം 304 റൺസാണ് ഇതിനകം നേടിയത്. കഴിഞ്ഞ ടി20 ലോകകപ്പിലെ പ്ലെയർ ഓഫ് ദി ടൂർണമെന്റ് പുരസ്കാരം നേടിയ ആത്മവിശ്വാസത്തിൽ കളിക്കുന്ന സഞ്ജുവിന് ഏകദിനത്തിൽ 56.66 എന്ന മികച്ച ബാറ്റിംഗ് ശരാശരിയുണ്ടെന്നതും സെലക്ടർമാരുടെ ശ്രദ്ധ ആകർഷിക്കുന്നു.മറുഭാഗത്ത് ലഖ്നൗ സൂപ്പർ ജയന്റ്സ് നായകനായ റിഷഭ് പന്തിന് ഈ ഐപിഎൽ സീസണിൽ പ്രതീക്ഷിച്ച ഫോമിലേക്ക് ഉയരാൻ കഴിഞ്ഞിട്ടില്ല. എട്ട് ഇന്നിംഗ്സുകളിൽ നിന്ന് വെറും 189 റൺസ് മാത്രമാണ് താരം നേടിയത്.
ഏകദിന ക്രിക്കറ്റിലെ പന്തിന്റെ ശരാശരി (33.50) സഞ്ജുവിനേക്കാൾ പിന്നിലാണെന്നതും തിരിച്ചടിയാണ്. പരിക്കിനെത്തുടർന്ന് നേരത്തെ പല പരമ്പരകളും നഷ്ടമായ പന്തിന്, യുവതാരം ധ്രുവ് ജൂറെലിന്റെ സാന്നിധ്യവും വലിയ വെല്ലുവിളി ഉയർത്തുന്നുണ്ട്. നിലവിലെ സാഹചര്യത്തിൽ ബാക്കപ്പ് കീപ്പർ സ്ഥാനത്തേക്ക് പന്തിനേക്കാൾ മുൻതൂക്കം സഞ്ജുവിനാണെന്നാണ് റിപ്പോർട്ടുകൾ സൂചിപ്പിക്കുന്നത്. ദക്ഷിണാഫ്രിക്ക, സിംബാബ്വെ, നമീബിയ എന്നിവിടങ്ങളിലായി നടക്കാനിരിക്കുന്ന ഏകദിന ലോകകപ്പിനുള്ള തയ്യാറെടുപ്പിലാണ് ഇന്ത്യൻ ടീം. നിലവിൽ കെ.എൽ. രാഹുൽ ഒന്നാം നമ്പർ വിക്കറ്റ് കീപ്പറായി തുടരുമ്പോൾ, ജൂണിൽ അഫ്ഗാനിസ്ഥാനെതിരെ നടക്കുന്ന ഏകദിന പരമ്പരയ്ക്കുള്ള ടീം പ്രഖ്യാപനം നിർണ്ണായകമാകും. സഞ്ജുവിന്റെ സ്ഥിരതയാർന്ന പ്രകടനവും പന്തിന്റെ മോശം ഫോമും പരിഗണിക്കുമ്പോൾ, ടീം മാനേജ്മെന്റ് സഞ്ജുവിനെ ബാക്കപ്പ് കീപ്പറായി ഉറപ്പിച്ചേക്കും. വരാനിരിക്കുന്ന പരമ്പരകളിൽ ഈ സ്ഥാനത്തിനായി ധ്രുവ് ജൂറെലും സെലക്ടർമാരുടെ പരിഗണനയിലുണ്ട്.
