തിരുവനന്തപുരം: ഓസ്ട്രേലിയക്കെതിരായ ഏകദിന പരമ്പരക്കുള്ള ഇന്ത്യന് ടീമില് നിന്ന് തഴഞ്ഞതില് മൗനം വെടിഞ്ഞ് മലയാളി താരം സഞ്ജു സാംസണ്. ഫേസ്ബുക്കില് പങ്കുവെച്ച പോസ്റ്റില് കഴിഞ്ഞത് കഴിഞ്ഞു ഞാന് മുന്നോട്ട് പോകുക തന്നെ ചെയ്യുമെന്നാണ് സഞ്ജു സാംസണ് ചിരിക്കുന്ന സ്മൈലി പങ്കുവെച്ച് കുറിച്ചത്. ഇന്ത്യന് ടീമില് നിന്ന് ഒഴിവാക്കിയതിലെ നിരാശ പങ്കുവെച്ച സഞ്ജുവിന്റെ ഫേസ്ബുക്ക് പോസ്റ്റിന് താഴെ മിനിറ്റുകള്ക്കുള്ളില് നിരവധി ആരാധകരാണ് പിന്തുണയുമായി എത്തിയത്. നിങ്ങള് ലക്ഷക്കണക്കിനാളുകളുടെ ഹൃദയത്തില് ഇടം നേടിയിട്ടുണ്ടെന്നും മുന്നോട്ട് തന്നെ പോകുകയെന്നും ആരാധകര് പ്രതികരിച്ചു. നിങ്ങള് യഥാര്ത്ഥ ചാമ്പ്യനാണെന്നും നിങ്ങളുടെ സമയം വരുമെന്നും പറഞ്ഞ ആരാധകര് കഴിഞ്ഞ കാര്യങ്ങളെക്കുറിച്ച് ചിന്തിച്ചിരിക്കാതെ മുന്നോട്ടുപോകുകയെന്നും സഞ്ജുവിനെ ആശ്വസിപ്പിക്കുന്നു.
നേരത്തെ ഫേസ്ബുക്കില് വെറും പുഞ്ചിരിക്കുന്ന ഇമോജി മാത്രം സഞ്ജു പോസ്റ്റ് ചെയ്തിരുന്നു. ഏഷ്യാ കപ്പിന് പിന്നാലെ ഇന്നലെയാണ് സെലക്ടര്മാര് ഓസ്ട്രേലയിക്കെതിരായ ഏകദിന പരമ്പരക്കുള്ള ടീമിനെ പ്രഖ്യാപിച്ചത്. ഏകദിനത്തില് മികച്ച റെക്കോര്ഡുള്ള സഞ്ജുവിന് മാത്രം ടീമില് ഇടം ലഭിക്കാതിരുന്നപ്പോള് ഏകദിനങ്ങളില് മോശം പ്രകടനം തുടരുന്ന സൂര്യകുമാര് യാദവ്, ശ്രേയസ് അയ്യര് എന്നിവരെ ടീമില് ഉള്പ്പെടുത്തി. റുതുരാജ് ഗെയ്കവാദും തിലക് വര്മയും ടീമിലിടം പിടിച്ചുവെന്നുള്ളതാണ് ആരാധകരെ ആശ്ചര്യപ്പെടുത്തുന്നത്.