മലയാള സിനിമയിലെ പ്രിയപ്പെട്ട നടനും സംവിധായകനുമായ ബേസിൽ ജോസഫും ക്രിക്കറ്റ് താരം സഞ്ജു സാംസണും തമ്മിലുള്ള ആഴത്തിലുള്ള സൗഹൃദം ആരാധകർക്കിടയിൽ ഏറെ ശ്രദ്ധേയമാണ്. ബേസിലിന്റെ പുതിയ ചിത്രമായ ‘അതിരടി’യിൽ സഞ്ജുവിനായി ഒരു പ്രത്യേക വേഷം കരുതിവെച്ചിരുന്നതായും എന്നാൽ പിന്നീട് ആ പ്ലാനുകളിൽ മാറ്റം വരുത്തേണ്ടി വന്നതായും ബേസിൽ ഇപ്പോൾ വെളിപ്പെടുത്തുന്നു. അതിരടിയുടെ കഥ ആദ്യം തയ്യാറാക്കുമ്പോൾ അതിൽ സഞ്ജു സാംസണായി ഒരു വേഷം മാറ്റിവെച്ചിരുന്നുവെന്ന് ബേസിൽ പറയുന്നു. സഞ്ജുവിനോട് ഈ വേഷത്തെക്കുറിച്ച് സംസാരിക്കുകയും ചെയ്തിരുന്നു. എന്നാൽ തന്റെ പദ്ധതികളിൽ നിലവിൽ അഭിനയം ഇല്ലാത്തതിനാൽ സഞ്ജു ആ വേഷം സ്നേഹപൂർവ്വം നിരസിക്കുകയായിരുന്നു. സഞ്ജുവിനൊപ്പം മറ്റൊരു പ്രമുഖൻ കൂടി ആ കഥാപാത്രമായി ഉണ്ടായിരുന്നുവെന്നും എന്നാൽ ആ വ്യക്തി ആരാണെന്ന് ഇപ്പോൾ വെളിപ്പെടുത്താൻ കഴിയില്ലെന്നും വനിതയ്ക്ക് നൽകിയ അഭിമുഖത്തിൽ ബേസിൽ വ്യക്തമാക്കി.
ബേസിൽ ജോസഫ്, ടൊവിനോ തോമസ്, വിനീത് ശ്രീനിവാസൻ എന്നിവർ അണിനിരക്കുന്ന ബിഗ് ബജറ്റ് മൾട്ടിസ്റ്റാർ ചിത്രമാണ് ‘അതിരടി’. മെയ് 14-നാണ് ചിത്രം ലോകമെമ്പാടുമുള്ള തിയേറ്ററുകളിൽ റിലീസ് ചെയ്യുന്നത്. നവാഗതനായ അരുൺ അനിരുദ്ധൻ സംവിധാനം ചെയ്യുന്ന ചിത്രത്തിൽ ‘സാം ബോയ്’ എന്ന കോളേജ് വിദ്യാർത്ഥിയായാണ് ബേസിൽ എത്തുന്നത്. റിയാ ഷിബുവും ചിത്രത്തിൽ പ്രധാന വേഷത്തിലുണ്ട്. സമീർ താഹിറും ടൊവിനോ തോമസും ചേർന്നാണ് ചിത്രം നിർമ്മിക്കുന്നത്.
