ചെന്നൈ : ലോട്ടറി രാജാവ് സാന്റിയാഗോ മാര്ട്ടിന്റെ 19.59 കോടി രൂപയുടെ സ്വത്തുക്കള് എന്ഫോഴ്സ്മെന്റ് ഡയറക്ടറേറ്റ് (ഇ.ഡി) കണ്ടുകെട്ടി. ലോട്ടറി അഴിമതിയുമായി ബന്ധപ്പെട്ടാണ് 19.59 കോടിയുടെ സ്വത്ത് കണ്ടുകെട്ടിയത്. നേരത്തെ 258 കോടിയുടെ സ്വത്തുക്കള് കണ്ടുകെട്ടിയിരുന്നു. ഇതോടെ കണ്ടുകെട്ടിയ സ്വത്തുക്കള് 277.59 കോടിയായി. സാന്റിയാഗോ മാര്ട്ടിന്, അദ്ദേഹത്തിന്റെ കമ്പനികളായ ഫ്യൂച്ചര് ഗെയിമിംഗ് ആന്ഡ് ഹോട്ടല് സര്വീസസ് പ്രൈവറ്റ് ലിമിറ്റഡ്, മാര്ട്ടിന് ബില്ഡേഴ്സ് പ്രൈവറ്റ് ലിമിറ്റഡ്, ഡെയ്സണ് ലാന്ഡ് ആന്ഡ് ഡെവലപ്മെന്റ് പ്രൈവറ്റ് ലിമിറ്റഡ് എന്നിവയില് നിന്നാണ് 19.59 കോടി രൂപയുടെ സ്വത്തുക്കള് പിടിച്ചെടുത്തത്.
പ്രതികള്ക്കെതിരെ ഇന്ത്യന് ശിക്ഷ നിയമത്തിലെ വിവിധ വകുപ്പുകള് പ്രകാരവും 1998ലെ ലോട്ടറി (റെഗുലേഷന്) ആക്ട് പ്രകാരവും സി.ബി.ഐയുടെ കൊച്ചി ഓഫീസ് സമര്പ്പിച്ച കുറ്റപത്രം പരിഗണിച്ചാണ് കള്ളപ്പണം വെളുപ്പിക്കല് നിരോധന നിയമപ്രകാരം ഇ.ഡി കേസെടുത്ത് അന്വേഷണം ആരംഭിച്ചത്. എം.ജെ അസോസിയേറ്റ്സ്, സാന്റിയാഗോ മാര്ട്ടിന്, എന്. ജയമുരുകന് എന്നിവര് ചേര്ന്ന് സിക്കിം സര്ക്കാറിന് ഏകദേശം 910.29 കോടി രൂപ നഷ്ടം വരുത്തിയതായി കണ്ടെത്തിയിരുന്നു. സാന്റിയാഗോ മാര്ട്ടിനും അദ്ദേഹത്തിന്റെ കമ്പനികളും മറ്റുള്ളവരും ലോട്ടറി ബിസിനസില് നിന്ന് സമ്പാദിച്ച തുക 40 കമ്പനികളിലായി വിവിധ സ്ഥലങ്ങളില് നിക്ഷേപിച്ചതായി ഇ.ഡി അന്വേഷണത്തില് കണ്ടെത്തിയിരുന്നു. കുടുംബാംഗങ്ങളുടെയും മറ്റ് കൂട്ടാളികളുടെയും പേരിലാണ് തുക നിക്ഷേപിച്ചത്.
