ചെന്നൈ : മുല്ലപ്പെരിയാര് ഡാമില് ജോലി ചെയ്യുന്ന തമിഴ്നാട് സര്ക്കാര് ജീവനക്കാര്ക്ക് ഉപഗ്രഹ സാറ്റലെറ്റ് മൊബൈല്ഫോണുകള് അനുവദിച്ചു. വിതരണം സെക്രട്ടേറിയറ്റില് നടന്ന ചടങ്ങില് മുഖ്യമന്ത്രി എം.കെ സ്റ്റാലിന് നിര്വഹിച്ചു. ജലവകുപ്പ്മന്ത്രി എസ്. ദുരൈമുരുകനും ഉന്നത വകുപ്പുതല ഉദ്യോഗസ്ഥരും സംബന്ധിച്ചു. പെരിയാര് വന്യജീവി സങ്കേതത്തിന്റെ മധ്യത്തിലാണ് ഡാം സ്ഥിതി ചെയ്യുന്നത്. ഇവിടെ ലാന്ഡ് ഫോണ് കണക്ഷനില്ല.
അണക്കെട്ടില് ജീവനക്കാര് 14 കിലോമീറ്ററോളം ബോട്ടില് യാത്ര ചെയ്യുന്നു. സുരക്ഷിതത്വത്തിന് ആശയവിനിമയ സേവനം അത്യന്താപേക്ഷിതമാണെന്ന ജലവിഭവ വകുപ്പിന്റെ റിപ്പോര്ട്ടിന്റെ അടിസ്ഥാനത്തിലാണ് നടപടി. ഈ സമയത്ത് മൊത്തം ആറ് സെറ്റ് സാറ്റലൈറ്റ് ഫോണുകളാണ് നല്കിയത്. ഇതിന്റെ ഒരു വര്ഷത്തെ സര്വീസ് ചാര്ജായി 9.50 ലക്ഷം രൂപ വകയിരുത്തി. സാറ്റലൈറ്റ് ടവര് സര്വീസ് കണക്ഷന് ഇല്ലാതെ നിബിഡ വനത്തിനുള്ളില് ഈ ഫോണുകള് ഉപയോഗിക്കാം. പെരിയാര് ഡാമിലെയും ഡാം ഫെറി റൂട്ടിലെയും എന്ജിനീയര്മാര്ക്കും ജീവനക്കാര്ക്കും ഏത് സമയത്തും ഏത് സാഹചര്യത്തിലും മുതിര്ന്ന ഉദ്യോഗസ്ഥരുമായി ആശയവിനിമയം നടത്താന് ഇത് സഹായകമാവും.
