സൗദി അറേബ്യ : വരും ദിവസങ്ങളിൽ കാലാവസ്ഥ പ്രതികൂലമാകാൻ സാധ്യത. ബുധനാഴ്ച മുതൽ തിങ്കളാഴ്ച വരെ വിവിധ മേഖലകളിൽ ഇടിമിന്നലോടുകൂടിയ ശക്തമായ മഴയ്ക്ക് സാധ്യതയുണ്ടെന്ന് സിവിൽ ഡിഫൻസ് മുന്നറിയിപ്പ് നൽകി. ചില പ്രദേശങ്ങളിൽ മിന്നൽപ്രളയം, ആലിപ്പഴമഴ, ശക്തമായ കാറ്റ് എന്നിവയ്ക്കും സാധ്യതയുണ്ട്.
മഴ ശക്തമാകുന്ന സാഹചര്യത്തിൽ താഴ്വരകൾ, വെള്ളക്കെട്ട് രൂപപ്പെടാൻ സാധ്യതയുള്ള പ്രദേശങ്ങൾ എന്നിവിടങ്ങളിൽ നിന്ന് ജനങ്ങൾ വിട്ടുനിൽക്കണമെന്ന് അധികൃതർ നിർദേശിച്ചു. പ്രളയജലത്തിലേക്ക് ഇറങ്ങുകയോ അതിലൂടെ വാഹനമോടിക്കുകയോ നീന്താൻ ശ്രമിക്കുകയോ ചെയ്യരുതെന്നും മുന്നറിയിപ്പുണ്ട്. ഔദ്യോഗിക മാധ്യമങ്ങളിലൂടെയും സോഷ്യൽ മീഡിയ പ്ലാറ്റ്ഫോമുകളിലൂടെയും പുറത്തുവരുന്ന കാലാവസ്ഥാ മുന്നറിയിപ്പുകളും സുരക്ഷാ നിർദേശങ്ങളും കൃത്യമായി പാലിക്കണമെന്നും സിവിൽ ഡിഫൻസ് അഭ്യർഥിച്ചു.
