വർക്കല : ചെമ്മരുതി ഗ്രാമപഞ്ചായത്തിന്റെയും ചെമ്മരുതി ഗവണ്മെന്റ് ആയുർവേദ ഡിസ്പെൻസറിയുടെയും സംയുക്താഭിമുഖ്യത്തിൽ പട്ടികജാതി വിഭാഗത്തിൽപ്പെട്ട സ്ത്രീകളുടെയും കുട്ടികളുടെയും ആരോഗ്യ സംരക്ഷണത്തിനായി നടപ്പിലാക്കിയ മരുന്നുവാങ്ങൽ പദ്ധതിയുടെ ഭാഗമായി സംഘടിപ്പിച്ച ദ്വിദിന എസ്.സി ആയുർവേദ മെഡിക്കൽ ക്യാമ്പ് സമാപിച്ചു. കുന്നത്തുമല പിഎച്ച്സി സബ് സെന്റർ, പോങ്ങുവിള അംഗനവാടി എന്നിവിടങ്ങളിൽ ശനി, ഞായർ ദിവസങ്ങളിലായി നടത്തിയ മെഡിക്കൽ ക്യാമ്പിൽ സ്ത്രീകളും കുട്ടികളുമടക്കം നിരവധി പേർ പങ്കെടുത്തു. രണ്ടാം ദിവസത്തെ മെഡിക്കൽ ക്യാമ്പ് പോങ്ങുവിള അംഗനവാടിയിൽ ചെമ്മരുതി ഗ്രാമപഞ്ചായത്ത് വൈസ് പ്രസിഡന്റ് ആർ.ലിനീസ് ഉദ്ഘാടനം ചെയ്തു. ചെമ്മരുതി ആയുഷ് ഹെൽത്ത് ആന്റ് വെൽനസ് സെന്റർ സീനിയർ മെഡിക്കൽ ഓഫീസർ ഡോ. ഗിരിജ.എസ് അധ്യക്ഷത വഹിച്ചു.
ആയുർവേദ മെഡിക്കൽ ഓഫീസർമാരായ ഡോ.എസ്.ഗിരിജ, ഡോ. ശ്രുതി ആർ.എസ്, ഡോ.രശ്മി ആർ.ജെ എന്നിവർ രോഗികളെ പരിശോധിച്ചു. ക്യാമ്പിൽ പങ്കെടുത്തവർക്ക് അരിഷ്ടങ്ങൾ, തൈലം ലേഹ്യം, നെയ്യ് എന്നിവ സൗജന്യമായി വിതരണം ചെയ്തു. ഫാർമസിസ്റ്റുമാരായ അവിനാശ്.ജെ, നന്ദു.സി.എൻ, അഞ്ജു ആർ.എസ്, ആശാവർക്കർമാരായ ബീന, ജയലത, സുനിത.കെ, ഉഷ.എസ്, മൾട്ടിപർപ്പസ് വർക്കർമാരായ സൗമ്യ.ഡി, വിദ്യ.റ്റി തുടങ്ങിയവർ രണ്ടു ദിവസങ്ങളിലായി നടന്ന എസ്.സി ആയുർവേദ മെഡിക്കൽ ക്യാമ്പിന് നേതൃത്വം നൽകി.
