ന്യൂഡല്‍ഹി : ഡല്‍ഹിയിലെ മുസ്ലിം ഭൂരിപക്ഷ പ്രദേശമായ ജഹാംഗീര്‍പുരി സി ബ്ലോക്കിലെ കെട്ടിടങ്ങള്‍ പൊളിക്കുന്നതിനെതിരായ ഹര്‍ജികള്‍ സുപ്രീംകോടതി വ്യാഴാഴ്ച പരിഗണിക്കും. ജസ്റ്റിസ് എല്‍.നാഗേശ്വര്‍ റാവു അധ്യക്ഷനായ ബെഞ്ചാണ് ഹര്‍ജി പരിഗണിക്കുന്നത്. ഡല്‍ഹി മുനിസിപ്പല്‍ കോര്‍പറേഷന്റെ നടപടി ഏകപക്ഷീയമാണെന്ന് ചൂണ്ടിക്കാട്ടി ജംഇയ്യത്തുല്‍ ഉലമായെ ഹിന്ദ് ഉള്‍പ്പെടെയുള്ളവരാണ് ഹര്‍ജി നല്‍കിയത്. മുതിര്‍ന്ന അഭിഭാഷകരായ പ്രശാന്ത് ഭൂഷണും കപില്‍ സിബലും ദുഷ്യന്ത് ദവേയുമാണ് ഹര്‍ജിക്കാര്‍ക്കായി ഹാജരാകുന്നത്. സി.പി.എം പി.ബി അംഗം വൃന്ദ കാരാട്ടും ഹരജി നല്‍കിയിട്ടുണ്ട്. ഹനുമാന്‍ ജയന്തി ഘോഷയാത്ര വര്‍ഗീയ സംഘര്‍ഷത്തില്‍ കലാശിച്ച ജഹാംഗീര്‍പുരിയില്‍ ബി.ജെ.പി ഭരിക്കുന്ന വടക്കന്‍ ഡല്‍ഹി മുനിസിപ്പല്‍ കൗണ്‍സിലിന്റെ നേതൃത്വത്തിലായിരുന്നു ഡല്‍ഹി പോലീസിന്റെ സഹായത്തോടെയുള്ള പൊളിച്ചു നീക്കല്‍.
പൊളിക്കല്‍ തുടങ്ങിയ ഉടന്‍ അത് തടഞ്ഞ് സുപ്രീംകോടതി ഉത്തരവിറങ്ങിയെങ്കിലും ഒന്നരമണിക്കൂര്‍ നേരം പൊളിക്കല്‍ തുടര്‍ന്നു. നോട്ടീസ് നല്‍കുന്നതടക്കം നടപടികള്‍ പാലിക്കാതെയാണ് ബുധനാഴ്ച ഒമ്പത് ബുള്‍ഡോസറുകള്‍ ജഹാംഗീര്‍ പുരി സി ബ്ലോക്കില്‍ എത്തിയത്. ആയിരത്തിലേറെ പോലീസുകാരുടെ അകമ്പടിയോടെ പൊളിക്കല്‍ തുടങ്ങി. പിന്നാലെ ജംഇയ്യത്തുല്‍ ഉലമായെ ഹിന്ദ് അഭിഭാഷകരായ കപില്‍ സിബല്‍, ദുഷ്യന്ത് ദവെ, സഞ്ജയ് ഹെഗ്ഡെ എന്നിവരും വൃന്ദ കാരാട്ടിന്റെ അഭിഭാഷകനായ അഡ്വ.സുരേന്ദ്ര നാഥും വിഷയം സുപ്രീംകോടതിയുടെ ശ്രദ്ധയില്‍പ്പെടുത്തുകയായിരുന്നു. വിഷയം വ്യാഴാഴ്ച പരിഗണിക്കാമെന്ന് വ്യക്തമാക്കിയ സുപ്രീംകോടതി അതുവരെ തല്‍സ്ഥിതി തുടരാന്‍ ഉത്തരവിട്ടു.
