ന്യൂഡല്ഹി : മന്ത്രി വീണാ ജോര്ജിന്റെ 2016ലെ തെരഞ്ഞെടുപ്പ് ജയം ചോദ്യംചെയ്തുള്ള ഹര്ജി സുപ്രീംകോടതി തള്ളി.തെരഞ്ഞെടുപ്പ് ജയത്തിനായി മതചിഹ്നങ്ങളെ ദുരുപയോഗം ചെയ്തെന്ന് ആരോപിച്ചുള്ള ഹര്ജി ജസ്റ്റിസ് സഞ്ജീവ്ഖന്നാ അദ്ധ്യക്ഷനായ ബെഞ്ചാണ് തള്ളിയത്.ആറന്മുളയില് വീണാജോര്ജിന്റെ എതിര്സ്ഥാനാര്ഥിയായിരുന്ന കോണ്ഗ്രസ് നേതാവ് കെ ശിവദാസന് നായരുടെ ഇലക്ഷന് ഏജന്റായിരുന്ന വി ആര് സോജിയാണ് സുപ്രീംകോടതിയില് ഹര്ജി നല്കിയത്. നാമനിര്ദേശപത്രികയില് ചില വിവരങ്ങള് മറച്ചുവെച്ചെന്നും ഹര്ജിക്കാരന് ആരോപിച്ചിരുന്നു. 2017 ഏപ്രിലില് ഈ ഹര്ജി കേരളാഹൈക്കോടതി തള്ളിയിരുന്നു.
ഇതേതുടര്ന്നാണ്, ഹര്ജിക്കാരന് സുപ്രീംകോടതിയെ സമീപിച്ചത്. വീണാജോര്ജ് മതത്തിന്റെ പേരില് വോട്ട് ചോദിച്ചെന്ന ആരോപണം തെളിയിക്കാനുള്ള തെളിവുകളൊന്നും ഹാജരാക്കാന് ഹര്ജിക്കാരന് സാധിച്ചിട്ടില്ലെന്ന് ഹൈക്കോടതി നിരീക്ഷിച്ചിരുന്നു. ഈ വാദം ശരിവെച്ചാണ് സുപ്രീംകോടതിയും ഹര്ജി തള്ളിയത്.
