ന്യൂഡല്ഹി: നടിയെ ആക്രമിച്ച കേസുമായി ബന്ധപ്പെട്ട ഹര്ജികള് ഇനി മുതല് ജസ്റ്റിസ് ദിനേശ് മഹേശ്വരി അദ്ധ്യക്ഷനായ ബെഞ്ച് പരിഗണിക്കും. ചീഫ് ജസ്റ്റിസ് യു.യു. ലളിതാണ് ഹര്ജികള് ഈ ബെഞ്ചിന് മുമ്പാകെ ലിസ്റ്റ് ചെയ്യാന് നിര്ദേശിച്ചത്. നേരത്തെ ഹര്ജികള് പരിഗണിച്ചിരുന്ന ജസ്റ്റിസ് എ.എം. ഖാന്വില്ക്കര് വിരമിച്ച പശ്ചാത്തലത്തിലാണ് പുതിയ നിര്ദ്ദേശം നല്കിയത്. നടിയെ ആക്രമിച്ച കേസിലെ വിചാരണ ആറു മാസത്തിനകം പൂര്ത്തിയാക്കണമെന്ന് ഉത്തരവിട്ട സുപ്രീംകോടതി ബെഞ്ചില് ജസ്റ്റിസ് എ.എം.ഖാന്വില്കര്ക്കൊപ്പം ജസ്റ്റിസ് ദിനേശ് മഹേശ്വരിയും ഉണ്ടായിരുന്നു.
നടിയെ ആക്രമിച്ച കേസില് വിചാരണ പൂര്ത്തിയാക്കി വിധിപറയാന് കൂടുതല് സമയം വേണമെന്നാവശ്യപ്പെട്ട് വിചാരണ കോടതി ജഡ്ജി സുപ്രീംകോടതിയെ സമീപിച്ചു. ആറു മാസത്തെ സമയമാണ് വിചാരണ കോടതി ജഡ്ജി ആവശ്യപ്പെട്ടിരിക്കുന്നതെന്നാണ് സൂചന. തിങ്കളാഴ്ച സുപ്രീംകോടതി ഈ ആവശ്യം പരിഗണിക്കും. വിചാരണ സമയബന്ധിതമായി പൂര്ത്തിയാക്കാന് വിചാരണ കോടതിക്ക് നിര്ദേശം നല്കണമെന്ന് ആവശ്യപ്പെട്ട് നടന് ദിലീപ് നല്കിയ അപേക്ഷയും സുപ്രീം കോടതി തിങ്കളാഴ്ച്ച പരിഗണിക്കും.
