ന്യൂഡല്ഹി : മുസ്ലിംകള്ക്കെതിരെ കലാപത്തിന് ആഹ്വാനം ചെയ്യുന്ന ഹിന്ദുത്വ നേതാക്കളായ യതി നരസിംഹാനന്ദ, ജിതേന്ദ്ര ത്യാഗി എന്നിവരെ അറസ്റ്റ് ചെയ്യണമെന്നാവശ്യപ്പെട്ട് നല്കിയ പൊതുതാല്പര്യ ഹര്ജി സുപ്രീംകോടതി പരിഗണിക്കാതെ തള്ളി. ഹര്ജിയില് വകുപ്പ് 32 പ്രകാരം അറസ്റ്റ് ആവശ്യപ്പെടാനാവില്ലെന്നു ചൂണ്ടിക്കാട്ടി ചീഫ് ജസ്റ്റിസ് യു.യു ലളിത് അധ്യക്ഷനായ ബെഞ്ചിന്റേതാണ് നടപടി. ഹര്ജിയിലെ അറസ്റ്റ് ആവശ്യം പിന്വലിക്കാമെന്നും മറ്റ് ആവശ്യങ്ങള് പരിഗണിക്കണമെന്നും ഹര്ജിക്കാര് ആവശ്യപ്പെട്ടെങ്കിലും കോടതി അംഗീകരിച്ചില്ല.
ജിതേന്ദ്ര ത്യാഗിയുടെ ‘മുഹമ്മദ്’ എന്ന പുസ്തകം നിരോധിക്കണമെന്നും ഹര്ജിയില് ആവശ്യപ്പെട്ടിരുന്നു. ഉത്തര്പ്രദേശ് ശിയ വഖഫ് ബോര്ഡ് മുന് ചെയര്മാനായിരുന്ന വസീം റിസ്വി കഴിഞ്ഞ ഡിസംബറിലാണ് മതം മാറി ജിതേന്ദ്ര ത്യാഗി എന്ന പേര് സ്വീകരിച്ചത്. ഹരിദ്വാറില് നടന്ന ധര്മസന്സദില് വിദ്വേഷ പ്രസംഗം നടത്തിയ കേസില് അറസ്റ്റിലായ ത്യാഗിയുടെ ഇടക്കാല ജാമ്യം കോടതി കഴിഞ്ഞ ദിവസം നീട്ടിനല്കിയിരുന്നില്ല.
