ഉത്തരാഖണ്ഡ് : ഉയര്ന്ന ജാതിയിലുള്ള സ്ത്രീ തയ്യാറാക്കിയ ഉച്ച ഭക്ഷണം കഴിക്കാന് വിസമ്മതിച്ച് ഉത്തരാഖണ്ഡിലെ സ്കൂള് കുട്ടികള്. നേരത്തെ സ്കൂളിലെ പാചകക്കാരിയായിരുന്ന സ്ത്രീ ദളിത് വിഭാഗക്കാരിയായിരുന്നു. ഇതില് ഒരുവിഭാഗം രക്ഷിതാക്കളും വിദ്യാര്ത്ഥികളും പ്രതിഷേധിച്ചിരുന്നു. ഇതിന് പിന്നാലെ ഉയര്ന്ന ജാതിയിലുള്ള വിദ്യാര്ത്ഥികള് ഉച്ചഭക്ഷണം കഴിക്കാന് വിസമ്മതിച്ചിരുന്നു. ഇതിനെ തുടര്ന്ന് ഇവരെ സ്കൂളില് നിന്ന് പിരിച്ച് വിട്ട് ഉയര്ന്ന ജാതിയില് നിന്നുള്ള സ്ത്രീയെ പാചകക്കാരിയായി നിയമിച്ചിരുന്നു. ഇതില് പ്രതിഷേധിച്ചാണ് ദളിത് വിദ്യാര്ത്ഥികള് ഭക്ഷണം കഴിക്കാന് വിസമ്മതിച്ചത്.
20 ലേറെ വിദ്യാര്ത്ഥികളാണ് ചമ്പാവതിയിലെ സര്ക്കാര് സ്കൂളില് ഉച്ചഭക്ഷണം കഴിക്കാതെ പ്രതിഷേധിച്ചത്. നേരത്തെ എസ് സി വിഭാഗത്തിലുള്ള ജീവനക്കാരിയെയാണ് സ്കൂളില് നിന്ന് പിരിച്ച് വിട്ടത്. 230 ഓളം കുട്ടികളാണ് ഉത്തരാഖണ്ഡിലെ ചമ്പാവത്ത് ജില്ലിയിലെ സുഖിധാംഗ് ഗ്രാമത്തിലെ ഈ സ്കൂളില് പഠിക്കുന്നത്. ഇതില് ആറ്, ഏഴ് ക്ലാസുകളിലെ വിദ്യാര്ത്ഥികളാണ് ദളിത് വിഭാഗത്തിലെ പാചകക്കാരിക്ക് എതിരെ പ്രതിഷേധിച്ചത്. ഇതേ തുടര്ന്ന് ജില്ലാ ഭരണകൂടം ഈ പ്രശ്നം പരിഹരിച്ചതായി വിശദമാക്കിയിരുന്നു. ഇരുവിഭാഗത്തിലെ ആളുകളുമായി വിഷയം രമ്യമായി പരിഹരിച്ചതായും ജില്ലാ ഭരണകൂടം ഡിസംബര് 26ന് വ്യക്തമാക്കി രംഗത്തെത്തിയിരുന്നു .
