പത്തനംതിട്ട : സ്കൂള് തുറക്കാന് ആഴ്ചകള് മാത്രം ബാക്കി നില്ക്കുമ്പോള് പത്തനംതിട്ടയില് സജീവമായി സ്കൂള് വിപണി. പുതിയ അധ്യന വര്ഷത്തില് സ്കൂളിലേക്ക് പോകാന് പുത്തന് കുടയും ബാഗുമെല്ലാം വാങ്ങുന്ന തിരക്കിലാണ് ജില്ലയിലെ വിദ്യാര്ഥികളും രക്ഷിതാക്കളും. കുടകളും ബാഗുകളുമെല്ലാം കുട്ടികള്ക്ക് ഇഷ്ടപ്പെടുന്ന രീതിയില് വിവിധ വര്ണ്ണങ്ങളിലാണ് വിപണിയില് എത്തിയിരിക്കുന്നത്. കാര്ട്ടൂണ് കഥാപാത്രങ്ങളുടെ ചിത്രങ്ങള് ആലേഖനം ചെയ്ത ബാഗുകളും വിപണിയില് സുലഭമാണ്. കണ്സ്യൂമര് ഫെഡിന്റെ കോന്നിയിലെ ജില്ലാതല സ്റ്റുഡന്സ് മാര്ക്കറ്റില് സ്കൂളിലേക്ക് ആവശ്യമായ എല്ലാ സാധനങ്ങളും വിലക്കുറവില് ലഭ്യമാണ്. ജില്ലയിലെ ത്രിവേണി സൂപ്പര്മാര്ക്കറ്റുകള് വഴിയും സ്കൂള് സൊസൈറ്റികള് വഴിയും പൊതുജനങ്ങള്ക്ക് ഉത്പന്നങ്ങള് വാങ്ങാന് കഴിയും.
ബാഗ്, കുട, നോട്ട്ബുക്കുകള്, പെന്സില് ബോക്സ്, വാട്ടര് ബോട്ടില് , മറ്റ് സ്റ്റേഷനറി ഉത്പന്നങ്ങള് എന്നിവയെല്ലാം ഇവിടെ ലഭ്യമാണ്. ത്രിവേണി എന്ന ബ്രാന്ഡില് കണ്സ്യൂമര് ഫെഡ് പുറത്തിറക്കുന്ന നോട്ടുബുക്കുകള് ആണ് ഇതില് പ്രധാനപ്പെട്ടവ. മറ്റ് ബ്രാന്ഡുകളുടെ ഉത്പന്നങ്ങള് പത്ത് മുതല് അറുപത് ശതമാനം വരെ വിലക്കുറവിലും ലഭിക്കും. മുന്നൂറു രൂപ മുതല് മൂവായിരം രൂപ വരെ നിരക്കില് ബാഗും കുടകളും ലഭിക്കുന്നുണ്ട്. കടകളില് നിന്നും വാങ്ങുന്നത് കൂടാതെ ഓണ്ലൈന് വില്പനകളും ജില്ലയില് സജീവമാണ്. സ്കൂള് തുറക്കുന്നതിന് മുന്പേ സാധനം വീട്ടില് എത്തുന്നു എന്നതിനാല് കൂടുതല് ആളുകളും ഓണ്ലൈന് വില്പനയെയാണ് ആശ്രയിക്കുന്നത്.
