തിരുവനന്തപുരം : സംസ്ഥാനത്ത് വിദ്യാലയങ്ങളില് ക്ലാസുകള് വൈകിട്ടുവരെയാക്കാനുള്ള തീരുമാനം കോവിഡിന്റെ പുതിയ വകഭേദമായ ഒമിക്രോണിന്റെ ആഘാതം കൂടി വിലയിരുത്തിയ ശേഷം മാത്രം. ഡിസംബര് 15 മുതല് ഒന്നുമുതല് 12 വരെയുള്ള ക്ലാസുകള് വൈകിട്ടുവരെയാക്കാന് വിദ്യാഭ്യാസവകുപ്പ് ഉന്നതതല യോഗത്തില് ധാരണയായിരുന്നു.
വിവിധ രാജ്യങ്ങളില് ഒമിക്രോണ് സ്ഥിരീകരിച്ചതോടെ സംസ്ഥാനത്തും ജാഗ്രത ശക്തമാണ്. സ്കൂളുകളുടെ നിലവിലെ സമയക്രമം മാറ്റണമെങ്കില് ദുരന്തനിവാരണവകുപ്പിന്റെ അനുമതി ആവശ്യമാണ്. ക്ലാസുകള് വൈകിട്ടുവരെ ആക്കുന്നതുസംബന്ധിച്ച നിര്ദേശങ്ങള് വിദ്യാഭ്യാസ വകുപ്പ് മുഖ്യമന്ത്രിക്ക് സമര്പ്പിച്ചിട്ടുണ്ട്. വിവിധ വകുപ്പുകളുമായി കൂടിയാലോചിച്ച് ഉടന് തീരുമാനമുണ്ടാകുമെന്നാണ് സൂചന.
