ഡല്ഹി : രാജ്യതലസ്ഥാനത്തേക്ക് സമരത്തിന് പുറപ്പെട്ട കര്ഷകരുമായി വീണ്ടും അനുനയചര്ച്ച നടത്താന് കേന്ദ്രസര്ക്കാര്. സമരത്തിന്റെ മൂന്നാംദിനമായ വ്യാഴാഴ്ച വൈകീട്ട് കേന്ദ്രമന്ത്രിമാരായ പിയൂഷ് ഗോയല്, അര്ജുന് മുണ്ടെ, നിത്യാനന്ദ് റായ് എന്നിവര് ചര്ച്ചകള്ക്കായി ചണ്ഡീഗഢിലെത്തും. സമരരംഗത്തുള്ള സംയുക്ത കിസാന് മോര്ച്ച രാഷ്ട്രീയേതര വിഭാഗത്തിന്റെയും കിസാന് മസ്ദൂര് മോര്ച്ചയുടെയും പ്രതിനിധികളുമായി ബുധനാഴ്ച വൈകീട്ട് ഓണ്ലൈനായി നടത്തിയ കൂടിക്കാഴ്ചയിലാണ് തീരുമാനം ഉണ്ടായത്.
ചൊവ്വാഴ്ച പഞ്ചാബില്നിന്ന് ട്രാക്ടറുകളിലും ട്രക്കുകളിലുമായി പുറപ്പെട്ട കര്ഷകര്ക്ക് ബുധനാഴ്ചയും ഹരിയാണ അതിര്ത്തി കടക്കാനായില്ല. ശംഭു, ഖനോരി അതിര്ത്തികളടച്ച് സമരക്കാരുടെ വഴിമുടക്കിയിരിക്കുകയാണ്. ഡല്ഹി അതിര്ത്തികളിലെ ഗ്രാമീണപാതകളിലും ദേശീയപാതയിലേക്ക് പോകുന്ന ഇടറോഡുകളിലും മണ്ണുമാന്തിയെത്തിച്ച് ആഴത്തിലുള്ള കിടങ്ങുകളുണ്ടാക്കി. ബാരിക്കേഡുകള് ഭേദിക്കാന് ഒരുസംഘം ശ്രമിച്ചതോടെ ബുധനാഴ്ച രാവിലെമുതല് കര്ഷകര്ക്കുനേരേ കണ്ണീര്വാതകപ്രയോഗമുണ്ടായി. സമരക്കാര് അതിര്ത്തിയിലെ ബാരിക്കേഡുകള്ക്കടുത്തേക്ക് നീങ്ങിയപ്പോഴെല്ലാം പോലീസ് നടപടിയുണ്ടായി. അതിനിടെ പോലീസിനുനേരേയും കല്ലേറുനടക്കുകയും ചെയ്തു.
