കൊച്ചി : സീനിയര് ജേര്ണലിസ്റ്റും ഫോറം സംസ്ഥാന കമ്മിറ്റി അംഗവുമായ മുഹമ്മദ് സലിം (74) അന്തരിച്ചു. കാക്കനാട് സഹകരണ ആശുപത്രിയില് ഞായറാഴ്ച രാവിലെയായിരുന്നു അന്ത്യം. കേരള പത്രപ്രവര്ത്തക യൂണിയന് സംസ്ഥാന കമ്മിറ്റി അംഗവും ഐ.എഫ്.ഡബ്ല്യു.ജെ നാഷണല് കൗണ്സില് അംഗവുമായി ദീര്ഘകാലം പ്രവര്ത്തിച്ച സലിം, സീനിയര് ജേണലിസ്റ്റ്സ് ഫോറം ജില്ലാ സെക്രട്ടറിയുമായിരുന്നു.
എറണാകുളം പ്രസ് ക്ലബ്ബില് ജോയിന്റ് സെക്രട്ടറി തുടങ്ങി വിവിധ ഉത്തരവാദിത്തങ്ങള് വഹിച്ച സലിം പ്രസ് ക്ലബ്ബിന്റെ ആക്റ്റിങ് സെക്രട്ടറിയായും സേവനമനുഷ്ഠിച്ചിട്ടുണ്ട്. പരേതനായ എ.സി. ജോസിന്റെ പത്രാധിപത്യത്തില് നടത്തിയിരുന്ന ടെലക്സ്, മംഗളം, മലയാള മണ്ണ്, കോഴിക്കോട്ടെ ന്യൂസ് കേരള എന്നീ പത്രങ്ങളില് ജോലിചെയ്തു. കുറച്ചു കാലം ‘പാര’ എന്ന ആക്ഷേപഹാസ്യ മാസികയും നടത്തി. ‘അസാധു’ വിനോദ മാസികയിലും പ്രവര്ത്തിച്ചിട്ടുണ്ട്.
ഇ കെ നായനാര് മുഖ്യമന്ത്രി ആയിരുന്ന കാലഘട്ടത്തില് കേരള പത്രപ്രവര്ത്തക യൂണിയനെ പ്രതിനിധീകരിച്ച് മുഖ്യമന്ത്രിയുടെ മാധ്യമ ഉപദേശക സമിതിയില് അംഗമായി. 1973-ല് കേരളം സന്തോഷ് ട്രോഫി നേടിയതു മുതല് കൊച്ചിയില് നടന്ന എല്ലാ ഫുട്ബോള് മേളകളുടേയും പബ്ലിസിറ്റി കണ്വീനറായിരുന്നു. ഖബറടക്കം ഞായറാഴ്ച ഉച്ചയ്ക്ക് ഒരു മണിക്ക് പടമുകള് ജുമാമസ്ജിദില് നടക്കും.
