തിരുവനന്തപുരം : സംസ്ഥാനത്ത് സെപ്റ്റംബര് 23ന് പെട്രോള് പമ്പുകള് അടച്ചിടുമെന്ന് കോണ്ഫെഡറേഷന് ഓഫ് കേരള പെട്രോളിയം ഡീലേഴ്സ് അസോസിയേഷന് നേതാക്കള് അറിയിച്ചു. എച്ച്.പി പമ്പുകള്ക്ക് കമ്പനി മതിയായ ഇന്ധന ലഭ്യത ഉറപ്പാക്കുക, ഐ.ഒ.സി പ്രീമിയം പെട്രേഡാള് അടിച്ചേല്പ്പിക്കുന്നത് അവസാനിപ്പിക്കുക, ബി.പി.സി, എച്ച്.പി.സി കമ്പനികള് ലൂബ്രിക്കന്റുകള് അടിച്ചേല്പ്പിക്കുന്നത് അവസാനിപ്പിക്കുക, എച്ച്.പി.സി. ബി.പി.സി. കമ്പനികള് ബാങ്ക് അവധി ദിവസങ്ങളില് ഇന്ധന ലഭ്യത ഉറപ്പാക്കുക തുടങ്ങിയ ആവശ്യങ്ങള് ഉന്നയിച്ചാണ് സമരം. കമ്പനികള് നിലപാടില് മാറ്റം വരുത്തണമെന്ന് നേതാക്കളായ ടോമി തോമസ്, വി.എസ്. അബ്ദുറഹ്മാന് എന്നിവര് വാര്ത്തസമ്മേളനത്തില് പറഞ്ഞു.
ആകെ പമ്പുകളില് 35 ശതമാനം വരുന്ന എച്ച്.പി പമ്പുകള് അടച്ചിടേണ്ട സ്ഥിതി വരുന്നു. തീരമേഖലയിലെ ഔട്ട്ലെറ്റുകളും ഡീസലില്ലാതെ അടച്ചിടേണ്ട സ്ഥിതിയുണ്ട്. ജൂലൈ അവസാന വാരം മുതല് പെട്രോള്, ഡീസല് എന്നിവ ആവശ്യത്തിന് കമ്പനി നല്കുന്നില്ല. ആഗസ്റ്റ് 13 മുതല് പ്രതിദിനം 200 ലോഡിന്റെ കുറവ് വിതരണത്തില് വരുത്തി. ഡീലര്മാര് നേരിടുന്ന പ്രശ്നങ്ങള് വിശദീകരിച്ച് മന്ത്രി ജി.ആര്. അനിലിന് സംഘടന നിവേദനം നല്കിയതായും അവര് പറഞ്ഞു.
