കൊച്ചി: വാഹനാപകടത്തില്പ്പെട്ട പതിനെട്ടുകാരന് മസ്തിഷ്കമരണം സംഭവിച്ചെന്ന റിപ്പോര്ട്ട് നല്കി അവയവങ്ങള് ദാനംചെയ്തെന്ന പരാതിയില് കൊച്ചി ലേക്ഷോര് ആശുപത്രിക്കും എട്ട് ഡോക്ടര്മാര്ക്കുമെതിരെ അന്വേഷണത്തിന് കോടതി ഉത്തരവ്. തലയില് രക്തം കട്ടപിടിച്ചത് നീക്കംചെയ്യാതെ യുവാവിനെ മസ്തിഷ്കമരണത്തിന് വിട്ടുകൊടുത്തുവെന്നാണ് പരാതി.
ബൈക്കപകടത്തില്പ്പെട്ട അബിന് വി ജെയുടെ അവയവങ്ങള് മലേഷ്യന് പൗരനാണ് ദാനം ചെയ്തത്. 2009 നവംബര് 29 നാണ് അപകടം നടന്നത്. കോതമംഗലം മാര് ബസേലിയസ് ആശുപത്രിയിലെത്തിച്ച യുവാവിനെ പിറ്റേദിവസം ലേക്ഷോറിലേക്ക് വിദഗ്ധ ചികിത്സയ്ക്കായി മാറ്റി. തൊട്ടടുത്ത ദിവസം മസ്തിഷ്കമരണം സംഭവിച്ചതായി അറിയിക്കുകയും കരളും വൃക്കകളും മാറ്റിവയ്ക്കുകയായിരുന്നു. കൊല്ലം സ്വദേശിയായ ഡോ. ഗണപതിയാണ് ഇക്കാര്യം ചൂണ്ടിക്കാട്ടി കോടതിയെ സമീപിച്ചത്.
