തിരുവനന്തപുരം: അരിക്കൊമ്പനെ കൈകാര്യം ചെയ്യുന്നതില് സര്ക്കാരിനും വനംവകുപ്പിനും അതീവ ഗുരുതരമായ വീഴ്ച സംഭവിച്ചെന്ന് കെപിസിസി പ്രസിഡന്റ് കെ സുധാകരന് എംപി. ഒരു നാടുമുഴുവന് പേടിച്ചരണ്ടു കഴിയുമ്പോള് സര്ക്കാരും കോടതിയും അതിന്റെ ഗൗരവം ഉള്ക്കൊള്ളാതെ ഉറക്കംതൂങ്ങുകയാണ്. അരിക്കൊമ്പന് കേസില് ഹൈക്കോടതി മാര്ച്ച് 29ന് ജനങ്ങളെ സാരമായി ബാധിക്കുന്ന വിധി പുറപ്പെടുവിച്ചിട്ട് അതിനെതിരേ കോടതിയില് സര്ക്കാര് നിയമനടപടി സ്വീകരിക്കാത്തത് എന്തുകൊണ്ടൊണെന്ന് ജനങ്ങള് അതിശയിക്കുകയാണെന്നും സുധാകരന് ചോദിച്ചു.
അതേസമയം അരിക്കൊമ്പന് വിഷയത്തില് ഹൈക്കോടതി നിയോഗിച്ച വിദഗ്ധ സമിതി ആനയിറങ്കല് സന്ദര്ശിച്ചു. ഇവിടുത്തെ റേഷന് കടയും തൊഴിലാളി ലയവും അരിക്കൊമ്പന് തകര്ത്തിരുന്നു. പ്രദേശത്ത് ജനപ്രതിനിധികളുമായും ജനങ്ങളുമായും വിദഗ്ധ സമിതി സംസാരിച്ചു . കുംകികളെ തളച്ചിരിക്കുന്ന സ്ഥലമായ സിമന്റ് പാലവും സമിതി സന്ദര്ശിച്ചു വരികയാണ്. പ്രദേശത്തെ സ്ഥിതിഗതികള് വിലയിരുത്തുന്നതിനാണ് വിദഗ്ധ സമിതി അംഗങ്ങള് ഇവിടെയെത്തിയത്.
