കോന്നി : പ്രായപൂർത്തിയാകാത്ത പെൺകുട്ടിയുടെ ശരീരത്തിൽ കടന്നുപിടിച്ച് ലൈംഗിക അതിക്രമം നടത്തിയ യുവാവിനെ തണ്ണിത്തോട് പോലീസ് അറസ്റ്റ് ചെയ്തു. ഓമല്ലൂർ മാത്തൂർ അമ്പലത്തിന് സമീപം അമ്പാടി ഭവനം വീട്ടിൽ നിന്നും തണ്ണിത്തോട് തേക്കുതോട് താഴെ പൂച്ചക്കുളം കോട്ടക്കൽ വീട്ടിൽ അനീഷ് ( 27 )ആണ് പിടിയിലായത്. 20 ന് വൈകിട്ട് നാലരയോടെ ഇയാളുടെ വീടിന്റെ ഹാളിൽ വെച്ചാണ് സംഭവം. കുട്ടി സ്കൂൾ ടീച്ചറോട് വിവരം പറഞ്ഞതിനെതുടർന്ന് ജില്ലാ ശിശു സംരക്ഷണ ഓഫീസിൽ നിന്നും 27 ന് പോലീസിനെ വിവരം അറിയിച്ചു.
ഉടനെതന്നെ വനിതാ പോലീസ് കുട്ടിയുടെ വീട്ടിലെത്തി മൊഴി രേഖപ്പെടുത്തി. പോക്സോ നിയമപ്രകാരം എസ് ഐ ജയരാജ് പണിക്കർ കേസ് രജിസ്റ്റർ ചെയ്തു. തുടർന്ന് പോലീസ് ഇൻസ്പെക്ടർ വി കെ വിജയരാഘവന്റെ നേതൃത്വത്തിൽ അന്വേഷണം നടത്തുകയും തുടർനടപടികൾ കൈക്കൊള്ളുകയും ചെയ്തു. പ്രതിയെ കരിമാൻതോട്ടിൽ നിന്നും ഉടനടി പിടികൂടി. സ്റ്റേഷനിൽ എത്തിച്ചു വിശദമായി ചോദ്യം ചെയ്തപ്പോൾ കുറ്റം സമ്മതിച്ചു. തുടർന്ന് ഇന്ന് രാവിലെ 11ന് അറസ്റ്റ് രേഖപ്പെടുത്തി. വൈകിട്ട് പ്രതിയെ കോടതിയിൽ ഹാജരാക്കി
