തിരുവനന്തപുരം : കോവിഡ് രോഗിയായ യുവതി ആംബുലന്സില് പീഡനത്തിന് ഇരയായ സംഭവത്തില് സര്ക്കാരിനെതിരെ വിമര്ശനവുമായി എംഎല്എ ഷാഫി പറമ്പില്. ക്രിമിനല് കേസുകളില് പ്രതിയായ ആളെ ആംബുലന്സിന്റെ ഡ്രൈവറാക്കിയത് ആദ്യത്തെ പിഴയാണെന്നും ഈ സര്ക്കാര് ക്രിമിനലുകള്ക്ക് ഒപ്പമല്ലാതെ ആര്ക്കൊപ്പമാണെന്നും ഷാഫി ഫേസ്ബുക്കില് പങ്കുവെച്ച കുറിപ്പിലൂടെ ചോദിക്കുന്നു.
കുറിപ്പിന്റെ പൂര്ണരൂപം……………………………..
നിരവധി അതീവ ഗൗരവതരമായ ക്രിമിനല് കേസുകളില് പ്രതിയായ നൗഫലിനെ 108 ആംബുലന്സിന്റെ ഡ്രൈവറായി ജീവന് രക്ഷിക്കാനേല്പ്പിച്ചത് ആദ്യത്തെ പിഴ. ആരോഗ്യ പ്രവര്ത്തകരൊപ്പമില്ലാതെ ഒരു അസുഖ ബാധിതയെ ആംബുലന്സില് കയറ്റി അയച്ചത് രണ്ടാമത്തെ പിഴ.
വാളയാറിലും പാലത്തായിയിലും ഉള്പ്പെടെ പീഡനക്കേസുകളില് പോലീസും സര്ക്കാരും പ്രതികള്ക്കൊപ്പം അടിയുറച്ച് നില്ക്കുന്നത് ക്രിമിനലുകള്ക്ക് പ്രചോദനവുമാകുന്നു. ഈ സര്ക്കാര് ക്രിമിനലുകള്ക്ക് ഒപ്പമല്ലാതെ ആര്ക്കൊപ്പമാണ് ?
