പത്തനംതിട്ട : ഇലന്തൂര് നരബലിക്കേസിലെ കേസിലെ മുഖ്യപ്രതി ഷാഫിയെ ബുധനാഴ്ച ആലപ്പുഴ രാമങ്കരിയില് എത്തിച്ച് തെളിവെടുപ്പ് നടത്തി. കൊല്ലപ്പെട്ട പത്മയുടെ വെള്ളി പാദസരം എ.സി. കനാലില് എറിഞ്ഞെന്നായിരുന്നു ഷാഫിയുടെ മൊഴി. ഇതനുസരിച്ചാണ് രാമങ്കരിയില് തെളിവെടുപ്പിന് കൊണ്ടുവന്നത്. പാദസരം കണ്ടെടുക്കാനായി മുങ്ങല്വിദഗ്ധരും പോലീസിനൊപ്പം ഉണ്ടായിരുന്നു.
രാമങ്കരിയില്വെച്ച് പാദസരം എറിഞ്ഞത് എങ്ങനെയാണെന്ന് ഷാഫി പോലീസിന് കാണിച്ചുനല്കി. കല്ല് എറിഞ്ഞാണ് പാദസരം ഉപേക്ഷിച്ചത് എങ്ങനെയാണെന്ന് വീണ്ടും കാണിച്ചു നല്കിയത്. ഇലന്തൂരില്വെച്ച് പത്മയെ കൊലപ്പെടുത്തി മൃതദേഹം കുഴിച്ചിട്ട ശേഷം ആഭരണങ്ങളുമായി മടങ്ങിയെന്നായിരുന്നു ഷാഫിയുടെ മൊഴി. സ്വര്ണാഭരണങ്ങള് ഇയാള് എറണാകുളത്തെ കടയില് പണയംവെച്ചിരുന്നു. വെള്ളി പാദസരം മാത്രമാണ് എ.സി. കനാലില് ഉപേക്ഷിച്ചത്.
കേസിലെ മറ്റുപ്രതികളായ ഭഗവല്സിങ്ങിനെയും ലൈലയെയും പത്തനംതിട്ടയില് എത്തിച്ചാണ് ബുധനാഴ്ച തെളിവെടുപ്പ് നടത്തിയത്. നരബലിക്ക് ഉപയോഗിച്ച കത്തി വാങ്ങിയ കടയിലാണ് ഭഗവല്സിങ്ങിനെ ആദ്യം തെളിവെടുപ്പിന് കൊണ്ടുവന്നത്. പത്തനംതിട്ട പോലീസ് സ്റ്റേഷന് സമീപത്തുള്ള കടയില്നിന്നാണ് ഭഗവല്സിങ് കത്തി വാങ്ങിയിരുന്നത്. ബുധനാഴ്ച പ്രതിയെ ഇവിടെ എത്തിച്ച് തെളിവെടുപ്പ് നടത്തി. ഭഗവല്സിങ്ങിനെ കടയിലുള്ളവര് തിരിച്ചറിയുകയും ചെയ്തു.
