കൊച്ചി: തെറ്റുണ്ടെങ്കില് നടപടി നേരിടാന് തയാറാണെന്ന് നടന് ഷമ്മി തിലകന്. തന്റെ ഭാഗം ആരും കേട്ടിട്ടില്ല. തന്നെ സംഘടനയില് നിന്ന് പുറത്താക്കിയിട്ടില്ലെന്നാണ് അമ്മ ഭാരവാഹികള് വാര്ത്താസമ്മേളനത്തില് പറയുന്നത്. പുറത്താക്കാന് മാത്രം തെറ്റൊന്നും ചെയ്തിട്ടില്ലെന്നും ഷമ്മി തിലകന് വ്യക്തമാക്കി. താന് ചൂണ്ടിക്കാട്ടിയ പ്രശ്നങ്ങള് എന്തിനു വേണ്ടിയാണെന്ന് അമ്മയിലെ ഭൂരിപക്ഷം അംഗങ്ങള്ക്കും അറിയില്ല. ഈ വിഷയങ്ങള് ചൂണ്ടിക്കാട്ടി ഭാരവാഹികള്ക്ക് നിരവധി കത്തുകള് നല്കിയിട്ടുണ്ട്. അതിന് യാതൊരു മറുപടിയും ലഭിച്ചിട്ടില്ല. ഈ കാര്യങ്ങള് അറിയാതെയാണ് തനിക്കെതിരെ അംഗങ്ങള് പ്രതികരിച്ചിട്ടുള്ളതെന്നും ഷമ്മി പറഞ്ഞു.
1994ല് അമ്മ എന്ന സംഘടന സ്ഥാപിതമായത് തന്റെ കൂടി പണം കൊണ്ടാണ്. സംഘടനയില് മൂന്നാമതായി അംഗത്വമെടുത്ത വ്യക്തിയാണ് താന്. ഇന്നത്തെ വൈസ് പ്രസിഡന്റ് മണിയന്പിള്ള രാജുവാണ് അന്ന് അംഗത്വ പണം വാങ്ങിയത്. അമ്മക്ക് വേണ്ടി ലെറ്റര്പാഡ് അടിക്കാനായി തന്റെ പണമാണ് അന്ന് ഉപയോഗിച്ചത്. ആ ലെറ്റര് പാഡില് തന്നെ പുറത്താക്കിയ നോട്ടീസ് വരുമ്പോള് പ്രതികരിക്കാമെന്നും ഷമ്മി തിലകന് മാധ്യമങ്ങളോട് പറഞ്ഞു.