തിരുവനന്തപുരം : ജനാധിപത്യമെന്ന് പേരിട്ട് കോണ്ഗ്രസില് കാലങ്ങളായി തുടരുന്ന ഹൈക്കമാന്ഡ് സംസ്കാരത്തിനെതിരെ രൂക്ഷവിമര്ശവുമായി ശശി തരൂര്. കോണ്ഗ്രസിലുള്ളത് ‘ഹൈക്കമാന്ഡ് സംസ്കാരം’ ആണെന്നും അതിന് അറുതി വരുത്തണമെന്നും പ്രമുഖ ഇംഗ്ലീഷ് പത്രത്തില് എഴുതിയ ലേഖനത്തില് അദ്ദേഹം പറഞ്ഞു. സംഘടനാ ഭാരവാഹികളെ ജനാധിപത്യപരമായി തെരഞ്ഞെടുക്കണം. അതിന് അടിത്തട്ടുവരെ അവകാശം നല്കണം. ജില്ലാ കോണ്ഗ്രസ് അധ്യക്ഷരെ തെരഞ്ഞെടുക്കുന്നതില് ഹൈക്കമാന്ഡോ എഐസിസി അധ്യക്ഷനോ ഇടപെടേണ്ടതില്ല. സംസ്ഥാന നേതൃത്വത്തിന് വിടണം.
സംഘടനാമികവ് മാത്രംവെച്ച് ഒരാളെ എഐസിസി അധ്യക്ഷനാക്കിയാല് വോട്ടുനേടാന് കഴിയില്ല. ജനങ്ങളെ ആകര്ഷിക്കാന് കഴിവുള്ള ‘ഊര്ജിത പ്രഭാവനായ’ ഒരാളെ അധ്യക്ഷനാക്കിയാല് വോട്ട് സമാഹരിക്കാം. മത ജാതി ഭാഷാ പരിഗണനകളേതുമില്ലാതെ ‘ഏവരെയും ഉള്ക്കൊള്ളുന്ന ഇന്ത്യ’ എന്ന ആശയം മുന്നോട്ടുവയ്ക്കാന് തനിക്കാകും. ഭാരത് ജോഡോ പോലെതന്നെ പ്രധാനമാണ് കോണ്ഗ്രസ് ജോഡോ എന്ന മുദ്രാവാക്യമെന്നും തരൂര് ലേഖനത്തില് പറഞ്ഞു.
