ഡര്ബന് : ഇന്ത്യയില് നിന്ന് ദക്ഷിണാഫ്രിക്കയിലെത്തിയ ചരക്ക് കപ്പലിലെ 14 ജീവനക്കാര്ക്ക് കോവിഡ് സ്ഥിരീകരിച്ചു. ഡര്ബനിലേക്ക് പോയ കപ്പലിലെ ജീവനക്കാര്ക്കാണ് രോഗബാധ സ്ഥിരീകരിച്ചത്. ട്രാന്സ്നെറ്റ് പോര്ട്ട് വക്താവാണ് ഇക്കാര്യം അറിയിച്ചത്. കപ്പലിലെ ചീഫ് എന്ജീനിയറുടെ മരണം കോവിഡ് ബാധിച്ചല്ലെന്നും തുറമുഖം അധികൃതര് വ്യക്തമാക്കി.
കപ്പല് ഡര്ബനിലെത്തിയുടന് മുഴുവന് ജീവനക്കാരേയും പരിശോധനക്ക് വിധേയമാക്കുകയായിരുന്നു. കോവിഡ് സ്ഥിരീകരിച്ചവരെ ഐസോലേഷനില് പാര്പ്പിച്ചിരിക്കുകയാണ്. ഇവരുമായി ബന്ധപ്പെട്ടവരെ കണ്ടെത്താനുള്ള ശ്രമങ്ങള് ആരംഭിച്ചു. കപ്പലിലെ ചരക്കിറക്കാനെത്തിയ 200ഓളം പേര് കോവിഡ് ബാധിച്ചവരുമായി ബന്ധപ്പെട്ടിരുന്നുവെന്ന സ്ഥിരീകരിക്കാത്ത റിപ്പോര്ട്ടുകള് പുറത്ത് വരുന്നുണ്ട്. നിലവില് കപ്പലിലേക്ക് ആരെയും പ്രവേശിപ്പിക്കുന്നില്ല.
കോവിഡിന്റെ ഇന്ത്യന് വകഭേദം ദക്ഷിണാഫ്രിക്കയിലുമെത്തിയെന്ന ആശങ്ക സമൂഹമാധ്യമങ്ങളിലൂടെ ജനങ്ങള് വ്യാപകമായി പ്രകടിപ്പിക്കുന്നുണ്ട്. എന്നാല് മറ്റ് രാജ്യങ്ങളില് നിന്നെത്തുന്നവരെ പരിശോധനക്ക് വിധേയമാക്കുന്നുണ്ടെന്നും ഇന്ത്യയില് നിന്ന് ദക്ഷിണാഫ്രിക്കയിലേക്ക് നേരിട്ട് വിമാനങ്ങളില്ലെന്നും ദക്ഷിണാഫ്രിക്കന് ആരോഗ്യമന്ത്രി പ്രതികരിച്ചു. മറ്റ് രാജ്യങ്ങള് വഴി ഇന്ത്യയില് നിന്ന് ദക്ഷിണാഫ്രിക്കയിലെത്തുന്നവരാണ് വെല്ലുവിളി സൃഷ്ടിക്കുന്നതെന്നും അദ്ദേഹം പറഞ്ഞു.
