ന്യൂഡല്ഹി: കോവിഡിന്റെ രണ്ടാം തരംഗത്തെ തുടര്ന്ന് രാജ്യത്ത് തൊഴിലില്ലായ്മ രൂക്ഷമാകുന്നു. തൊഴിലില്ലായ്മ നിരക്ക് നാല് മാസത്തിനിടയിലെ ഉയര്ന്ന നിലയിലെത്തി. പല സംസ്ഥാനങ്ങളും കോവിഡിനെ തുടര്ന്ന് പ്രാദേശിക ലോക്ഡൗണുകള് പ്രഖ്യാപിച്ചതാണ് സ്ഥിതി രൂക്ഷമാക്കിയത്.
പ്രാദേശിക ലോക്ഡൗണുകളെ തുടര്ന്ന് 70 ലക്ഷം പേര്ക്കെങ്കിലും തൊഴില് നഷ്ടമായെന്നാണ് കണക്കാക്കുന്നത്. മെയ് മാസത്തിനുള്ളില് കോവിഡിനെ പിടിച്ചുകെട്ടാന് കഴിഞ്ഞില്ലെങ്കില് സ്ഥിതി വഷളാകുമെന്ന് സാമ്പത്തിക വിദഗ്ധര് മുന്നറിയിപ്പ് നല്കുന്നു.
നിലവില് എട്ട് ശതമാനമാണ് ഇന്ത്യയിലെ തൊഴിലില്ലായ്മ നിരക്ക്. മാര്ച്ചില് ഇത് 6.5 ശതമാനം മാത്രമായിരുന്നു. സെന്റര് ഫോര് മോണിറ്ററിങ് ഇന്ത്യന് ഇക്കോണമിയെന്ന സ്ഥാപനമാണ് പഠനം നടത്തിയത്. നഗരപ്രദേശങ്ങളില് 9.78 ശതമാനവും ഗ്രാമീണമേഖലയില് 7.13 ശതമാനവുമാണ് തൊഴിലില്ലായ്മ നിരക്ക്.
അസംഘടിത മേഖലയെയാണ് കോവിഡ് കൂടുതലായി ബാധിച്ചതെന്നും പഠനത്തില് പറയുന്നു. ഈ മേഖലയിലാണ് കൂടുതല് തൊഴില് നഷ്ടമുണ്ടായിരിക്കുന്നത്. അതേസമയം 2020ല് കോവിഡിന്റെ ഒന്നാം തരംഗം ഉണ്ടായപ്പോള് സമ്പദ്വ്യവസ്ഥക്കുണ്ടായ തിരിച്ചടി പോലൊന്ന് ഇപ്പോഴുണ്ടാവില്ലെന്നും വിദഗ്ധര് വ്യക്തമാക്കുന്നു. ലോക്ഡൗണ് പ്രഖ്യാപിച്ചാലും ഇല്ലെങ്കിലും ഇന്ത്യയുടെ സമ്പദ് വ്യവസ്ഥയില് കോവിഡ് കടുത്ത പ്രതിസന്ധിയുണ്ടാക്കുമെന്ന് തന്നെയാണ് വിദഗ്ധര് നല്കുന്ന മുന്നറിയിപ്പ്.