കല്‍പറ്റ : കുറുക്കന്‍മൂലയിലെ ആദിവാസി യുവതി ശോഭയുടെ കൊലയാളികളെ കണ്ടെത്താനുള്ള ക്രൈംബ്രാഞ്ച് അന്വേഷണം നടന്നുവരവെ ഉദ്യോഗസ്ഥനെ സ്ഥലംമാറ്റിയത് കേസ് അട്ടിമറിക്കാനുള്ള നീക്കത്തി‍െന്റെ ഭാഗമാണെന്ന് ഊരുസമിതിയും സമരസഹായ സമിതിയും ആരോപിച്ചു. അസ്വാഭാവിക മരണത്തിന് മാത്രം കേസെടുക്കുകയും തെളിവുകള്‍ നശിപ്പിക്കാന്‍ കൂട്ടുനില്‍ക്കുകയും ചെയ്ത ലോക്കല്‍ പൊലീസി‍ന്റെയും ആദിവാസികള്‍ക്കെതിരായ കേസുകള്‍ മാത്രം കൈകാര്യംചെയ്യുന്ന എസ്.എം.എ.സ് ഡി.വൈ.എസ്.പി ഓഫിസി‍ന്റെയും താല്‍പര്യങ്ങളെ മറികടന്ന് കേസ് ക്രൈംബ്രാഞ്ചിനെ ഏല്‍പിച്ചത് ശക്തമായ ബഹുജന പ്രക്ഷോഭത്തെ തുടര്‍ന്നാണ്.
ശോഭയുടെതുള്‍പ്പെടെ വയനാട്ടിലെ മറ്റൊരു ആദിവാസി യുവാവ് കൊല്ലപ്പെട്ട കേസിലും അന്വേഷണം നടത്തുന്ന ഉദ്യോഗസ്ഥനാണ് സ്ഥലം മാറ്റപ്പെട്ടത് എന്നത് ആദിവാസികളോടുള്ള ഭരണസംവിധാനങ്ങളുടെ മനോഭാവമാണ് വ്യക്തമാക്കുന്നതെന്നും എത്രയുംപെട്ടെന്ന് കാര്യക്ഷമമായ അന്വേഷണം നടത്തി കുറ്റപത്രം സമര്‍പ്പിക്കുന്നതിന് സര്‍ക്കാര്‍ അടിയന്തര നടപടി സ്വീകരിക്കണമെന്നും ഊരു സമിതി കണ്‍വീനര്‍ കെ.ജെ സിന്ധു, സമരസഹായ സമിതി കണ്‍വീനര്‍ പി.പി ഷാന്‍റോലാല്‍ എന്നിവര്‍ വാര്‍ത്തക്കുറിപ്പില്‍ ആവശ്യപ്പെട്ടു.
