ഹൈദരാബാദ്: തിരക്കേറിയ റോഡിലൂടെ ആറ് വയസ്സുകാരിയായ കൊച്ചുമകളെക്കൊണ്ട് കാർ ഓടിപ്പിച്ച തെലങ്കാനയിലെ സബ് ഇൻസ്പെക്ടർക്ക് (എസ്ഐ) സസ്പെൻഷൻ. രംഗറെഡ്ഡി ജില്ലയിൽ നടന്ന സംഭവത്തിൽ പൂജാരി തിരുപ്പതി എന്ന ഉദ്യോഗസ്ഥനെതിരെയാണ് പോലീസ് കേസെടുക്കുകയും സർവീസിൽ നിന്ന് സസ്പെൻഡ് ചെയ്യുകയും ചെയ്തത്. തിരക്കുള്ള റോഡിലൂടെ അസ്വാഭാവികമായ രീതിയിൽ പതുക്കെ നീങ്ങിയ വാഹനത്തിന്റെ മുൻസീറ്റിലേക്ക് നാട്ടുകാർ ശ്രദ്ധിച്ചപ്പോഴാണ് സ്റ്റിയറിങ് കൈകാര്യം ചെയ്യുന്നത് ആറ് വയസ്സുകാരിയായ കുട്ടിയാണെന്ന് കണ്ടെത്തിയത്. നാട്ടുകാർ വാഹനം തടഞ്ഞു ചോദ്യം ചെയ്തതോടെ, കൊച്ചുമകൾക്ക് ഏറ്റവും പ്രായം കുറഞ്ഞ ഡ്രൈവർക്കുള്ള ഗിന്നസ് റെക്കോർഡ് നേടിക്കൊടുക്കാനുള്ള പരിശീലനമാണിതെന്ന വിചിത്ര വാദവുമായി എസ്ഐ രംഗത്തെത്തുകയായിരുന്നു.
സംഭവസ്ഥലത്തുനിന്നുള്ള ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചു. “ഇത് എന്റെ തീരുമാനമാണ്, എന്നെ ചോദ്യം ചെയ്യാൻ നിങ്ങൾ ആരാണ്” എന്ന് എസ്ഐ നാട്ടുകാരോട് പ്രകോപിതനായി ചോദിക്കുന്നതും ദൃശ്യങ്ങളിലുണ്ട്. നിയമപാലകർ തന്നെ നിയമം ലംഘിക്കുന്നതിനെതിരെ പൊതുജനങ്ങളിൽ നിന്ന് കടുത്ത വിമർശനമാണ് ഉയർന്നത്. തുടർന്ന് നർസിംഗി പോലീസ് അപകടകരമായ രീതിയിൽ വാഹനം ഓടിക്കൽ, പ്രായപൂർത്തിയാകാത്ത ആളെക്കൊണ്ട് വാഹനം ഓടിപ്പിക്കൽ തുടങ്ങിയ ബിഎൻഎസ് വകുപ്പുകൾ പ്രകാരം ഇയാൾക്കെതിരെ കേസെടുത്തു.
