പത്തനംതിട്ട : കിണറ്റിലകപ്പെട്ട വലിയ കാട്ടുപന്നിയെ വനപാലകരുടെ നേതൃത്വത്തില് വെടിവച്ച് കൊന്നു. വാര്യാപുരം വളവില് ടി.കെ റോഡിന് സമീപമുള്ള കിണറ്റിലാണ് 150 കിലോയിലധികം തൂക്കം വരുന്ന ആണ് വര്ഗത്തില്പ്പെട്ട കാട്ടുപന്നി വീണത്. ഇന്നലെ രാവിലെ 11ന് ആണ് സംഭവം. വാര്യാപുരം നെല്ലിക്കുന്നത്ത് ഏബ്രാഹാമിന്റെ പുരയിടത്തിലെ ഉപയോഗശൂന്യമായ കിണറ്റിലാണ് പന്നിയെ കണ്ടെത്തിയത്. പുരയിടത്തില് വാടകയ്ക്ക് താമസിക്കുന്ന ജോലിക്കാരനാണ് ആദ്യം പന്നിയുടെ കരച്ചില് കേള്ക്കുന്നത്. ഇയാള് ഏബ്രഹാമിനേയും അദ്ദേഹത്തിന്റെ ബന്ധുവായ സാം ജോയിക്കുട്ടിയേയും വിവരം അറിയിക്കുകയായിരുന്നു. തുടര്ന്ന് വനംവകുപ്പില് വിവരം അറിയിച്ചു.
റാന്നി സെക്ഷന് ഫോറസ്റ്റ് ഓഫീസര് സുരേഷ് കുമാറിന്റെ നേതൃത്വത്തില് ഷൂട്ടര്മാരായ ഷാരോണ് പനവേലി, എബിന് കൈതവന എന്നിവരടങ്ങിയ സംഘമെത്തിയാണ് കാട്ടുപന്നിയെ പുറത്തെത്തിച്ചത്. വെടിവച്ച് കൊന്നതിന് ശേഷം വല ഉപയോഗിച്ച് കരക്കെത്തിക്കുകയായിരുന്നു. ഇലന്തൂര്, കൊല്ലംപടി, വാര്യാപുരം ഭാഗത്ത് കാട്ടുപന്നി കൃഷി നശിപ്പിക്കുന്നതും ആക്രമിക്കുന്നതും പതിവാണെന്ന് നാട്ടുകാര് പറഞ്ഞു. ഇരുചക്രവാഹന യാത്രക്കാര്ക്കും ഇവ വലിയ ഭീഷണിയാണ്.
