മാനന്തവാടി : സബ് ആര്ടിഒ ഓഫീസിലെ ജീവനക്കാരി സിന്ധുവിന്റെ മരണത്തില് ബന്ധുക്കളുടെയും സഹപ്രവര്ത്തകരുടെയും മൊഴി പോലീസ് ഇന്ന് രേഖപ്പെടുത്തും. ഭിന്നശേഷിക്കാരിയായ സിന്ധുവിനെ തൂങ്ങി മരിച്ച നിലയില് കണ്ടെത്തിയ എള്ളുമന്ദത്തെ വീട്ടില് കഴിഞ്ഞ ദിവസം പോലീസ് വിശദമായ പരിശോധന നടത്തിയിരുന്നു. സിന്ധു ഉപയോഗിച്ചിരുന്ന മൊബൈല് ഫോണും ലാപ്ടോപും പോലീസ് കസ്റ്റഡിയിലെടുത്തിട്ടുണ്ട്. മുറിയില് നിന്ന് ഡയറിയും ചില കുറിപ്പുകളും കണ്ടെത്തിയെന്നാണ് സൂചന.
ഓഫീസിലെ സഹപ്രവര്ത്തകരില് നിന്നുണ്ടായ മാനസിക പീഡനമാണ് ആത്മഹത്യയ്ക്ക് കാരണമെന്നാണ് ബന്ധുക്കളുടെ ആരോപണം. വിഷയത്തില് മോട്ടോര് വാഹനവകുപ്പും അന്വേഷണം നടത്തും. മാനന്തവാടി ഓഫീസിലെ പ്രശ്നങ്ങളില് കല്പ്പറ്റ ആര്ടിഒയെ നേരില് കണ്ട് സിന്ധു 3 ദിവസം മുന്പ് പരാതി നല്കിയെന്നാണ് വിവരം. സംഭവത്തില് സമഗ്ര അന്വേഷണം ആവശ്യപ്പെട്ട് വിവിധ യുവജന സംഘടനകള് മാനന്തവാടി സബ് ആര്ടിഒ ഓഫീസിലേക്ക് മാര്ച്ച് നടത്തും.
