കൊച്ചി: എറണാകുളം ജില്ലയിലെ 14ല് 12 നിയമസഭ മണ്ഡലങ്ങളിലും സിറ്റിങ് എം.എല്.എമാര് തന്നെ മത്സരിക്കാന് സാധ്യതയേറി. യു.ഡി.എഫിന്റെ ഒന്പതില് കളമശ്ശേരിയില് മാത്രമാണ് അവ്യക്തത. എല്.ഡി.എഫിന്റെ അഞ്ച് സിറ്റിങ് സീറ്റില് വൈപ്പിനില് എസ്. ശര്മ രംഗത്ത് ഉണ്ടാകില്ല.
യു.ഡി.എഫ് എം.എല്.എമാരായ വി.ഡി. സതീശന് (പറവൂര്), അന്വര് സാദത്ത് (ആലുവ), എല്ദോസ് കുന്നപ്പിള്ളി (പെരുമ്പാവൂര്), റോജി എം. ജോണ് (അങ്കമാലി), അനൂപ് ജേക്കബ് (പിറവം), ടി.ജെ. വിനോദ് (എറണാകുളം), പി.ടി. തോമസ് (തൃക്കാക്കര), വി.പി. സജീന്ദ്രന് (കുന്നത്തുനാട്) എന്നിവരാണ് വീണ്ടും മത്സരം ഉറപ്പിച്ചത്. എല്.ഡി.എഫില് എല്ദോ എബ്രഹാം (മൂവാറ്റുപുഴ), എം. സ്വരാജ് (തൃപ്പൂണിത്തുറ), കെ.ജെ. മാക്സി (കൊച്ചി), ആന്റണി ജോണ് (കോതമംഗലം) എന്നിവരും മത്സരിക്കാന് സാധ്യതയേറി.
പാലാരിവട്ടം പാലം അഴിമതിക്കേസില് അറസ്റ്റിലായി ജാമ്യത്തില് ആശുപത്രിയില് കഴിയുന്ന മുസ്ലിംലീഗിലെ വി.കെ. ഇബ്രാഹീംകുഞ്ഞിനെ വീണ്ടും മത്സരിപ്പിക്കുന്നതില് പാര്ട്ടി തീരുമാനം എടുത്തിട്ടില്ല. അദ്ദേഹത്തിന്റെ സ്ഥാനാര്ഥിത്വം അഴിമതി പ്രചാരണ വിഷയമാക്കാന് എല്.ഡി.എഫിന് സഹായകമാകുമെന്ന് യു.ഡി.എഫില് അഭിപ്രായമുണ്ട്. അതേസമയം ഇബ്രാഹീംകുഞ്ഞ് തന്നെ വേണമെന്നാണ് പ്രാദേശിക നേതാക്കള് ലീഗ് നേതൃത്വത്തോട് ആവശ്യപ്പെട്ടത്. 2016ല് ബാര് കോഴ കേസില്പെട്ട കെ. ബാബു തൃപ്പൂണിത്തുറയില് വീണ്ടും മത്സരിച്ചപ്പോള് എം. സ്വരാജിനെ ഇറക്കി സീറ്റ് പിടിച്ചെടുത്തപോലെ ഇബ്രാഹീംകുഞ്ഞ് സ്ഥാനാര്ഥിയായാല് എ.എ. റഹീമിനെയോ മുഹമ്മദ് റിയാസിനെയോ രംഗത്തിറക്കുമെന്ന് പ്രചാരണമുണ്ട്. എന്നാല് പാര്ട്ടി പ്രാദേശിക നേതൃത്വം കെ. ചന്ദ്രന്പിള്ള, അഡ്വ. മുജീബ് റഹ്മാന് എന്നിവരുടെ പേരാണ് നിര്ദേശിക്കുന്നത്.
ആറുതവണ എം.എല്.എയായ എസ്. ശര്മ ഇക്കുറി ഉണ്ടാകില്ലെന്ന് ഉറപ്പായിട്ടുണ്ട്. പകരം ജില്ല പഞ്ചായത്ത് ചെറായി ഡിവിഷനില്നിന്ന് വിജയിച്ച എം.ബി. ഷൈനിക്കാണ് സാധ്യത. മഹിള അസോസിയേഷന് വൈപ്പിന് ഏരിയ സെക്രട്ടറിയും ജില്ല എക്സിക്യൂട്ടിവ് അംഗവുമാണ്. കുന്നത്തുനാട് ഇരുമുന്നണിക്കും ഭീഷണിയായ ട്വന്റി20യെ ലീഗ് നേതാവ് മുനവ്വറലി തങ്ങളും തുടര്ന്ന് ഉമ്മന് ചാണ്ടി, രമേശ് ചെന്നിത്തല എന്നിവരടങ്ങുന്ന കോണ്ഗ്രസ് സംഘവും സന്ദര്ശിച്ചിരുന്നു. യു.ഡി.എഫ് അനുകൂല നിലപാട് എടുക്കാന് ട്വന്റി20ക്ക് മേല് ചെലുത്തിയ സമ്മര്ദം ഫലിച്ചതായാണ് സൂചന.