തിരുവനന്തപുരം : ശിവഗിരി തീര്ത്ഥാടന നവതി ആഘോഷങ്ങളുടെ ആഗോളതല ഉദ്ഘാടനം ഇന്ന് പ്രധാനമന്ത്രി നരേന്ദ്രമോദി നിര്വഹിക്കും. ബ്രഹ്മവിദ്യാലയ സുവര്ണ ജൂബിലി ആഘോഷങ്ങള്ക്കും ഇന്ന് തുടക്കമാകും. ദേശീയ അന്തര്ദേശീയ തലത്തില് ഒരു വര്ഷം നീളുന്ന പരിപാടികള്ക്കാണ് ഇതോടെ തുടക്കം കുറിക്കുന്നത്. ലോക് കല്യാണ് മാര്ഗില് നടക്കുന്ന ചടങ്ങില് ഒരു വര്ഷം നീണ്ടുനില്ക്കുന്ന സംയുക്ത ആഘോഷങ്ങളുടെ ലോഗോ പ്രകാശനവും പ്രധാനമന്ത്രി നിര്വഹിക്കും.
ശിവഗിരി തീര്ത്ഥാടനവും ബ്രഹ്മവിദ്യാലയവും ആരംഭിച്ചത് സാമൂഹിക പരിഷ്കര്ത്താവ് ശ്രീനാരായണ ഗുരുവിന്റെ അനുഗ്രഹവും മാര്ഗനിര്ദേശവും കൊണ്ടാണ്. ബ്രഹ്മവിദ്യാലയ ജൂബിലി, തീര്ത്ഥാടന നവതി ആഘോഷങ്ങളുടെ ഉദ്ഘാടന ചടങ്ങില് ശ്രീനാരായണ ധര്മ്മസംഘം ട്രസ്റ്റ് പ്രസിഡന്റ് സ്വാമി സച്ചിദാനന്ദ, ജനറല് സെക്രട്ടറി സ്വാമി ഋതംഭരാനന്ദ, ട്രഷറര് സ്വാമി ശാരദാനന്ദ, ബ്രഹ്മവിദ്യാലയ കനകജൂബിലി ആഘോഷക്കമ്മിറ്റി സെക്രട്ടറി സ്വാമി വിശാലാനന്ദ, ഗുരുധര്മ്മ പ്രചരണസഭാ സെക്രട്ടറിയും തീര്ത്ഥാടന നവതി ആഘോഷക്കമ്മിറ്റി സെക്രട്ടറിയുമായ സ്വാമി ഗുരുപ്രസാദ് ഉള്പ്പെടെയുള്ളവര് ചടങ്ങില് പങ്കെടുക്കും.
