കൊച്ചി : ലൈഫ് മിഷന് കേസില് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം.ശിവശങ്കറിനെ സി.ബി.ഐ ഇന്ന് ചോദ്യം ചെയ്യും. രാവിലെ സിബിഐ കൊച്ചി ഓഫീസില് ഹാജരാകാനാണ് നിര്ദ്ദേശം. ഇത് സംബന്ധിച്ച നോട്ടീസ് ശിവശങ്കറിന് നല്കിയിരുന്നു. കേസില് ശിവശങ്കറിനെ ആദ്യമായാണ് സിബിഐ ചോദ്യം ചെയ്യുന്നത്. കഴിഞ്ഞ ദിവസം പ്രതി സ്വപ്ന സുരേഷിന്റെ മൊഴി സിബിഐ രേഖപ്പെടുത്തിയിരുന്നു. ഇതിന് പിന്നാലെയാണ് എം.ശിവശങ്കറിനെ ചോദ്യം ചെയ്യാന് തീരുമാനിച്ചത്. സ്വര്ണക്കടത്തുകേസ് പ്രതി പി.എസ്.സരിത്ത്, ലൈഫ് മിഷന്റെ കരാര് ഏറ്റെടുത്ത യൂണിടാക് എംഡി സന്തോഷ് ഈപ്പന് എന്നിവരെ സിബിഐ നേരത്തേ ചോദ്യം ചെയ്തിരുന്നു.
ലൈഫ് മിഷന് ഭവന നിര്മാണ പദ്ധതിയുടെ ഭാഗമായ വടക്കാഞ്ചേരി പദ്ധതി നടപ്പിലാക്കാന് ശിവശങ്കറിന് ഒരു കോടി രൂപ കൈക്കൂലി ലഭിച്ചതായി ഡോളര് കടത്തുകേസില് കസ്റ്റംസ് ആരോപിച്ചിരുന്നു. ശിവശങ്കറിനെ ആറാം പ്രതിയാക്കിയാക്കി കസ്റ്റംസ് സാമ്പത്തിക കുറ്റവിചാരണക്കോടതിയായ എറണാകുളം അഡീ. സിജെഎം കോടതിയില് സമര്പ്പിച്ച കുറ്റപത്രത്തിലായിരുന്നു ആരോപണം.
