തിരുവനന്തപുരം : പെരുമാതുറ മുതലപ്പൊഴിയില് ശക്തമായ തിരയില് മത്സ്യബന്ധന വള്ളങ്ങള് കൂട്ടിമുട്ടി എട്ട് പേര്ക്ക് പരിക്കേറ്റു. ഇടിയുടെ ആഘാതത്തില് സമീപത്തെ പുലിമുട്ടില് ഇടിച്ച് കയറിയ വള്ളം പൂര്ണ്ണമായി തകര്ന്നു. ഇന്ന് രാവിലെ 6 മണിയോടെയാണ് സംഭവം.
മുതലപ്പൊഴിയില് നിന്നും മത്സ്യബന്ധനത്തിനായി പോകവെ, അഴിമുഖത്തുണ്ടായ ശക്തമായ തിരമാലയില് നിയന്ത്രണം നഷ്ടപ്പെട്ട വള്ളത്തില് മറ്റൊരു വള്ളം ഇടിച്ചായിരുന്നു അപകടം. പെരുമാതുറ സ്വദേശികളുടെ ഹസ്ബി റബ്ബി എന്ന വള്ളത്തില് സെന്റ് ജോസഫ് എന്ന മറ്റൊരു വള്ളം ഇടിക്കുകയായിരുന്നു. 23 പേര് അടങ്ങുന്ന സംഘമാണ് വള്ളത്തിലുണ്ടായിരുന്നത്. ഇവരെ മറ്റ് മത്സ്യ തൊഴിലാളികള് രക്ഷപ്പെടുത്തി.
നിസ്സാമുദ്ദീന്, സിദ്ധീഖ്, സൈദലി, കബീര്, ഷാക്കിര്, നഹാസ്, സുബൈര്, മുജീബ് എന്നിവര്ക്കാണ് അപകടത്തില് പരിക്കേറ്റത്. ഇവരെ ചിറയിന്കീഴ് താലൂക്കാശുപത്രിയില് പ്രവേശിപ്പിച്ചു. അപകടത്തെ തുടര്ന്ന് തകര്ന്ന വള്ളത്തിലുണ്ടായിരുന്ന വല സെന്റ് ജോസഫ് വള്ളത്തില് കുരുങ്ങി. തകര്ന്ന വള്ളവും വലയും കായലില് എത്തിച്ചെങ്കിലും കരയ്ക്ക് എത്തിക്കുന്നതിനായുള്ള ശ്രമങ്ങള് തുടരുകയാണ്.
