മലയിന്‍കീഴ് : കാഴ്ച ശക്തി കുറഞ്ഞിട്ടും ആരെയും ആശ്രയിക്കാതെ ജീവിക്കാനാണ് വിളപ്പില്‍ശാല ചൊവ്വള്ളൂര്‍ പ്ലാക്കോട് ദീപാ ഭവനില്‍ സി.രാജു ( 65 ) പഴയ ഇരുമ്പ് പെട്ടിക്കട കടമായി വാങ്ങിയത്. പക്ഷേ, ഒരു ദിവസം പോലും അതു തുറന്നു പ്രവര്‍ത്തിക്കാന്‍ അദ്ദേഹത്തിന് സാധിച്ചില്ല. റോഡരികില്‍ വച്ചതിന്റെ പിറ്റേന്നു രാത്രി അതു മോഷണം പോയി. ചായയും പലഹാരങ്ങളും തയാറാക്കി വില്‍ക്കുന്നതിനായാണു രാജു 18ന് പരിചയക്കാരന്റെ പക്കല്‍ നിന്ന് ചെറിയ ഇരുമ്പ് പെട്ടിക്കട സംഘടിപ്പിച്ചത്.
വിലയായ 20,000 രൂപ നാലുമാസത്തവണയായി കൊടുക്കാമെന്നു ഉറപ്പ് നല്‍കി. വിളപ്പില്‍ശാല – മൈലാടി റോഡില്‍ പാലയ്ക്കല്‍ എന്ന സ്ഥലത്ത് നാട്ടുകാരുടെ സഹായത്തോടെ കട സ്ഥാപിക്കുകയും ചെയ്തു. പിറ്റേന്ന് തുറന്നു പ്രവര്‍ത്തിക്കാമെന്നു നിശ്ചയിച്ച്‌ കട പൂട്ടി അദ്ദേഹം മടങ്ങി. എന്നാല്‍ ആ രാത്രി തന്നെ വൈദ്യുത തൂണുമായി ബന്ധിപ്പിച്ച്‌ കെട്ടിയിരുന്ന ചങ്ങല പൂട്ട് തകര്‍ത്ത് കട ആരോ കടത്തി.
കണ്ണിന് കാഴ്ചക്കുറവ്, ഹൃദ്രോഗം എന്നിവ ബാധിച്ചതോടെയാണു മുമ്പു കൂലിപ്പണിക്കാരനായിരുന്ന രാജു കട നടത്തി ജീവിക്കാന്‍ തീരുമാനിച്ചത്. ഭാര്യ എലിസബത്തും ഈ തീരുമാനത്തെ പിന്തുണച്ചു. വിവാഹിതരായ രണ്ട് പെണ്‍മക്കളെയും ആശ്രയിക്കാതെ ജീവിക്കാനാണ് ഇവര്‍ ലക്ഷ്യമിട്ടത്. എന്നാല്‍ പെട്ടിക്കട നഷ്ടമായതോടെ അതും വഴിമുട്ടി.
