കോഴിക്കോട്: താമരശേരിയില് ദമ്പതികളെ തട്ടിക്കൊണ്ടുപോയ സംഭവം സ്വര്ണ്ണക്കടത്തുമായി ബന്ധപ്പെട്ട പണമിടപാടിന്റെ പേരിലെന്ന് സൂചന. തട്ടിക്കൊണ്ടുപോകപ്പെട്ട ഷാഫിക്ക് കോടികളുടെ ഇടപാടുണ്ടെന്നും സൗദിയില് നിന്ന് കോടികളുടെ സ്വര്ണ്ണം തട്ടിയതുമായി ഇതിന് ബന്ധമുണ്ടെന്നും പോലീസിന് വിവരം ലഭിച്ചു. റൂറല് ജില്ലാ പോലീസ് മേധാവിയുടെ നേതൃത്വത്തില് ഏതാനും പേരെ ചോദ്യം ചെയ്തപ്പോഴാണ് നിര്ണ്ണായക വിവരങ്ങള് ലഭിച്ചത്. സൗദി എയര്പോര്ട്ടില് നിന്ന് തട്ടിയെടുത്ത 300 കിലോ സ്വര്ണ്ണം വില്പ്പന നടത്തിയതുമായി ബന്ധപ്പെട്ട കോടികളുടെ ഇടപാടാണ് ഷാഫിയെ തട്ടിക്കൊണ്ടുപോകുന്നതില് എത്തിയതെന്നാണ് പോലീസിന് ലഭിക്കുന്ന സൂചന.
താമരശ്ശേരി പരപ്പന്പൊയില് കുറുന്തോട്ടിക്കണ്ടി ഷാഫി, ഭാര്യ സനിയ എന്നിവരെ വെള്ളിയാഴ്ച രാത്രി തോക്കുമായെത്തിയ സംഘം തട്ടിക്കൊണ്ടുപോയത്. സനിയയെ അല്പം അകലെ ഇറക്കി വിട്ടിരുന്നു. കൊടുവള്ളി സ്വദേശിയായ സാലിയും മറ്റൊരാളും തമ്മിലുള്ള സാമ്പത്തിക ഇടപാടിന് മധ്യസ്ഥ വഹിച്ചിരുന്നുവെന്നും ഇതിന്റെ പേരില് സാലിയുടെ നേതൃത്വത്തിലുള്ള സംഘം വീട്ടിലെത്തി ഭീഷണിപ്പെടുത്തിയിരുന്നു എന്നുമാണ് ഷാഫിയുടെ ബന്ധുക്കള് പറഞ്ഞിരുന്നത്.