പാലക്കാട് : പാലക്കാട് അങ്കനവാടിയില് പാമ്പ് കയറി. പട്ടാമ്പി കൂറ്റനാട് നാഗലശ്ശേരി 15-ാം വാര്ഡിലെ അങ്കണവാടിയിലാണ് സംഭവം. രാവിലെ ഇവിടേക്ക് എത്തിയ ടീച്ചറാണ് ഇതിനെ ആദ്യം കണ്ടത്. അടുക്കളയോട് ചേര്ന്നുള്ള ജനലിനിടയിലൂടെ അകത്തേക്ക് കയറിവരുന്ന പാമ്പിനെ കണ്ടതോടെ ടീച്ചറും കുട്ടികളും ഭയന്നു.
ചേര ഇനത്തില് പെട്ട പാമ്പാണെന്നാണ് ആദ്യം കരുതിയത്. എന്നാല് ശബ്ദമുണ്ടാക്കിയപ്പോള് പാമ്പ് പത്തി വിടര്ത്തി. ഇതോടെ ടീച്ചര്മാര് നാട്ടുകാരേയും രക്ഷിതാക്കളെയും വിവരമറയിച്ചു. ആളുകളുടെ അനക്കം കേട്ടതോടെ പാമ്പ് അടുക്കളയില് കയറിയിരുന്നു. തുടര്ന്ന് വനംവകുപ്പില് നിന്ന് ലൈസന്സ് അനുവദിച്ചിട്ടുള്ള മണികണ്ഠനെ വിളിച്ച് സര്പ്പത്തിനെ പാത്രത്തിലാക്കുകയായിരുന്നു. സമീപ പ്രദേശത്തെ കുറ്റിക്കാട്ടില് നിന്നാണ് ഇത്തരം ഇഴജന്തുക്കള് അങ്കനവാടിയില് എത്തിയത്.
