തിരുവല്ല : യുവതലമുറയിൽ വർദ്ധിച്ചുവരുന്ന മാരകമായ ലഹരി ഉപയോഗത്തിനെതിരെ എസ്.എൻ.ഡി.പിയോഗം തിരുവല്ല യൂണിയനും വനിതാസംഘം യൂണിയനും മറ്റ് പോഷകസംഘടനകളും സംയുക്തമായി തിരുവല്ല കെ.എസ്.ആർ.ടി.സി കോർണറിൽ ലഹരിവിരുദ്ധ സന്ദേശ സദസ് സംഘടിപ്പിച്ചു. പത്തനംതിട്ട വിമുക്തി മിഷൻ അസിസ്റ്റന്റ് എക്സൈസ് കമ്മിഷണർ സനിൽ.എസ് ഉദ്ഘാടനം ചെയ്തു. യൂണിയൻ വനിതാസംഘം പ്രസിഡന്റ് സുമ സജികുമാർ അദ്ധ്യക്ഷത വഹിച്ചു. എസ്.എൻ.ഡി.പി.യോഗം ഇൻസ്പെക്ടിംഗ് ഓഫീസർ എസ്.രവീന്ദ്രൻ എഴുമറ്റൂർ മുഖ്യപ്രഭാഷണം നടത്തി.
തിരുവല്ല അസിസ്റ്റന്റ് എക്സൈസ് കമ്മീഷണർ എം.പി വേണുഗോപാൽ ലഹരിവിരുദ്ധ സന്ദേശം നൽകി. യൂണിയൻ അഡ്മിനിസ്ട്രേറ്റർ സന്തോഷ് ശാന്തി ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. യോഗം അസിസ്റ്റന്റ് സെക്രട്ടറി പി.എസ്.വിജയൻ ലഹരിവിരുദ്ധ സന്ദേശ നാടകം ഫ്ലാഗ് ഓഫ് ചെയ്തു. യൂണിയൻ വനിതാ സംഘം സെക്രട്ടറി മണിയമ്മ സോമശേഖരൻ, ട്രഷറർ കവിതാ സുരേന്ദ്രൻ, യൂണിയൻ യൂത്ത് മൂവ്മെന്റ് ജോ.കൺവീനർ ശരത് ശശി, സൈബർസേന കൺവീനർ ബിബിൻ ബിനു, യൂണിയൻ പെൻഷനേഴ്സ് ഫോറം കൺവീനർ പത്മജ സാബു, എംപ്ലോയീസ് ഫോറം കൺവീനർ സന്തോഷ് കുമാർ എസ് എന്നിവർ പ്രസംഗിച്ചു.
